واشک جلہو پاکستان نا وحدت، آئین و ریاست آ جلہو تکنگک،وزیر اعلیٰ میر سرفراز بگٹی

وزیراعلیٰ بلوچستان میر سرفراز بگٹی ضلع واشک نا تحصیل ماشکیل اٹی بے گناہ مزور کار آتا کشت و خون نا سخت انگا لوز آتیٹی مذمت ءِ کرسا پارینے کہ شہید مروک آک بیرہ پنجابی مزورکار الوسہ بلکن او پاکستان نا شاری، خواری کش و ننا جند انا ایلمک ئسرہ۔ اوفتیا جلہو اسہ صوبہ اس یا قومیت اسے آ آخا بلکن پاکستان نا وحدت، آئین و ریاست آ جلہو ءِ۔ وزیراعلیٰ پارے کہ آجوئی نا پن انا تحریک نا بیرشت ءِ بینوک دہشت گرد آک دُو خالی مزور کار آتے شست کننگ اٹ اسہ وار ولدا تینا لغوری و پراگندہ ارادہ غاتے دنیا نا مون آ پاش کرینو۔ او پارے کہ بے گناہ خواری کش آتے خلنگ سیاسی جہد یا آجوئی نا تحریک اس آخا بلکن پیدوار دہشت گردی، بربریت و انسانیت نا برخلاف بھلو ڈوہ اسے۔ میر سرفراز بگٹی پارے کہ دہشت گرد آتا مسخت حق انا جہد اف بلکن دہشت، بدبیسئی خونریزی و پاکستان ءِ نزور کننگ ءِ۔ دا وڑ انا بندغ آک لسانی و علاقائی بدبیسئی ءِ ودفسا قومی یکجہتی ءِ نسخان رسیفنگ خوارہ، ولے مچ آ قوم اوفتا دا ارادہ غاتے سرسہب مننگ کن الیپک۔ وزیراعلیٰ پیدوار کرے کہ ریاست دشمن و اوفتا کمکار آتے ہچ بشخنگپک۔ پاکستانی شاری تا دتر نا ہر پڑی نا حساب ہلنگک و دا ڈوہ انا زموار ہر دہشت گرد و اونا کمکار ءِ کانود نا رِد اٹ اونا ایسر اسکان سر کننگک۔ او پارے کہ ریاست نا رٹ آ جلہو کروک آتا برخلاف کارروائیک مستی فیصلہ ئی، بھرمی و بے فرق مریرہ۔ دہشت گرد آتیکن بلوچستان نا ڈغار ءِ تنک کننگک و شاری تا جان و مال انا رکھ ءِ امر کہ مرے پک کننگک۔ میر سرفراز بگٹی دا ارادہ نا دوارگی ءِ کرے کہ پاکستان نا ریاست دہشت گردی نا مون آ ہچ کاٹم شیف کپک۔ دہشت گردی نا برخلاف جنگ آخریکو دہشت گرد نا چٹفنگ اسکان پورو واکداری، قومی عزم و السی مخ تفی اٹ برجا سلک۔