وزیراعلیٰ نا ہنہ اوڑک نا دورہ‘برجا آپریشن شعبان نا جاچ ءِ ہلک

وزیراعلیٰ بلوچستان میر سرفراز بگٹی یک شنبے نادے ہنہ اڑک نا خلق ببری نا دورہ ءِ کرے‘ ہراڑے او دہشت گرد آتا برخلاف برجا آپریشن شعبان ناجاچ ءِ ہلک و آپریشن اٹ بشخ ہلوک پولیس فورس انا ورناتتون اوڑدہی کرے۔ وزیر اعلیٰ پولیس کارندہ غاتتون اسٹ اسٹ آ اوڑدہی کرسا اوفتا بہادری، عزم، کسبی لائخی و فرض شناسی ءِ گچین لوز آتے ٹیخراج تحسین پیش کرے او پارے کہ دہشت گردی نا برخلاف جنگ اٹ پولیس، لیویز، فرنٹیئر کور وایلو سیکورٹی فورس آتا قربانیک مچ آ قوم اکن گمر نا سوب ءُ‘ او پارے کہ بلوچستان نا امن کن جان ندر کروک آک قوم انا حقی ہیروک ءُ و اوفتا خذمت آتے مدام یات تخنگک۔ میر سرفراز بگٹی پارے کہ دہشت گرد و اوفتا کمکار آتا برخلاف کارروائیک آخریکو دہشتگرد نا چٹفنگ اسکان پورو قوت، پدریسہ و فیصلہ ئی وڑ اٹ برجا سلرہ۔ اوکان گڈ وزیراعلیٰ بلوچستان ہنہ اوڑک سانحہ نا شہید آتا خاہوت آتتون اوڑدہی کرے۔ اوفتتون ہڑزخواہی‘ دعا پاتیہ و شہید آتا درجہ غاتا بڑزی کن دعا کرے او شہید آتا خاہوت آتے باور کرفے کہ حکومت بلوچستان اوفتا غم اٹ بریبر نا شریدار ءِ و شہید آتا خاہوت آتے ہر وڑ انا کمک و پورو سرکاری کمکاری فراوان کننگک۔ وزیراعلیٰ پارے کہ شہید آتا قربانیک زیان مفسہ۔