بلوچستان نیشنل پارٹی نا کنڈ آن ہم دبئی اوڑدہی آ اعتراض چست

لاہور :  بلوچستان نیشنل پارٹی ہم دبئی اوڑدہی تیا اعتراض کرے و پارینے کہ پی ڈی ایم نا سروک مولانا فضل الرحمان حق آٹے‘ بی این پی ءِ ہم سلاہ اتپننگ آ ننا گڑتیک اریر‘ آئین نا رد اٹ نن گچین کاری تے وخت آ مننگ آن توننگ کپنہ۔ بلوچستان نیشنل پارٹی نا راہشون حاجی میر ہاشم نوتیزئی نجی ٹی وی تون ہیت وگپ کرسا دبئی اوڑدہی تا بابت پارے کہ اِرا بھلا حکومتی جماعت آتا اوڑدہی آ مولانا فضل الرحمن نا اعتراض درست ءِ‘ ہر سیاسی‘ آئینی باندات آ سیوتی تے سلاہ اٹی اتنگ المی مریک۔ میر ہاشم نوتیزئی پارے کہ مولانا حق آتے‘ بی این پی ءِ ہم سلاہ اٹ اتپننگ جوان اف‘ ن لیگ و پی پی چنکا سیوتی جماعت آتے سلاہ اٹ اتپسہ تو دا سیاسی ردینک اس مریک‘ بی این پی نا راہشون پارے کہ ہندا چنکا جماعت آک خراب انگا وخت اٹ سلوک ئسر و مونی ہم اواری اٹ کاریم کننگے‘ اگہ بی این پی شہبازشریف ءِ وونٹ تتوکہ تو اونا وونٹ آک پورو الوس۔ گچین کاری تا بابت سوج آ اوپارے کہ آئینی وڑ اٹ نن گچین کاری تے پک کروک وخت آ مننگ آن توننگ کپنہ‘ سیاسی کارندہ سے نا وڑ اٹ ای پاوہ کہ بایدے آئین نا خلاف ورزی مف۔ اِرا دے مست اسمبلی تے پرغنگا تو دا آئین نا خلاف ورزی مریک‘ آئین نا رد اٹ 12 و 13 اگست نا نیام اٹ اسمبلیک تینٹ پنرہ۔ ہاشم نوتیزئی پارے کہ اگہ پنچ سال اٹ الس کن ہچ کننگ کتون تو دا اسہ تُو اٹ انت کننگو‘ پی ڈی ایم نا جماعت آک خوارہ کہ گچین کاریک وخت آ مریر۔

(آن لائن)