کشمیری تے زور انا زی آ جہد آن توننگ مفک، میر قدوس بزنجو

کوئٹہ : وزیراعلیٰ بلوچستان میر عبدالقدوس بزنجو پارینے کہ کشمیری تا وتواجہی نا توار ءِ شیف شاغنگ مفک‘ مقبوضہ کشمیر آ بھارتی ریاستی جور و ہموڑے مروک انسانی حق آتے لتاڑنگ نا اقوام متحدہ و کل جہانی برادری بایدے نوٹس ءِ ہلے‘ وزیراعلیٰ یوم شہدائے کشمیر نا رد اٹ تینا کلہو اٹ پارینے کہ دا دے ننے ہمو عظیم آقربانی تے یات ترفک ہو کودک و دو خالی کشمیری تیا ڈوگرہ فورس اناکنڈآن کننگا‘ دا اسہ ہندن ءُ دے اسے ہرا ننے پاہک کہ حق و راست انا توار ءِ زوراکی اٹ شیف شاغنگ مفک‘ اوپارے کہ بھارتی ریاستی دہشت گردی نا سوب آن لکھ آ بے گناہ کشمیری تے شہیدکننگانے‘ بے کچ چناتے چوری کننگانے‘ کشمیر اٹ آجوسلاہ درشانی و برانز آ رکھ خلنگانے‘ اگہ ہموڑے برانز مریک تو بھارتی فوج کشمیری تیا پیلٹ گنز و سدھا سم کاری کیک‘ اوپارے کہ مقبوضہ کشمیر نا حریت راہشون تے ہندوستان ناکنڈآن دزگیرکننگک و بندی کننگک ولے شاید بھارت است آن درینے کہ کشمیری تا توار ءِ جور وبیدادی اٹ چُپ کرفنگ مفک‘ اوپارے کہ پاکستان و بلوچستان نا الس مقبوضہ کشمیر ناالس نا آجوئی ناجہد اٹ اوفتتون سلوک ءِ‘ ننا خواست ءِ کہ اقوام متحدہ نا قرارداد آتا رد اٹ کشمیری الس نا استخواہی تا ترجمانی ءِ کننگ کن کشمیری تے اوفتا حق آتے تننگے و بھارت کشمیر نا خصوصی حیثیت نا درجہ ءِ پدی بحال کے و ہموڑے انسانی حق آتے لتاڑنگ ناواقعہ غاتے توننگ کن کشمیری تے اوفتا وتواجہی نا حق ءِ تننگے۔

(خ ن)