یو اے ای ہم ارب ڈالر نا ریزور اسٹیٹ بینک اٹ جمع کرفے، اسحاق ڈار

اسلام آباد : بنجائی وزیر خزانہ اسحاق ڈار قوم آن مستائی ہلسا پارینے کہ سعودی عرب آن پدایلم ملک یو اے ای ءِ ہم اسہ ارب ڈالر نا ریزرو اسٹیٹ بینک اٹ جمع کرفینے‘ یو اے ای وزیراعظم نا دورہ نا وخت آ ڈیپازٹ ناقول کریسس‘ آرمی چیف جنرل عاصم منیر ہم دا بابت کوشست کرے ہرافتا بھرم بس‘ مست آنبار ننا سنگت ملک سعودی عرب و یو اے ای سختی تا وخت اٹ نن تون کمک کریر‘ سعودی عرب و یو اے ای نا ڈیپازٹ آن پد ننا ریزرو اٹ مسہ ارب ڈالر نا ودکی مسنے‘دانا زرگزران آ جوان ءُ زہم تمک و ڈیفالٹ مننگ نا ہرا غوغا کننگاکہ او ہم چٹانے۔ میڈیا تون ہیت وگپ کرسا بنجائی وزیر خزانہ اسحاق ڈار پارے کہ ننے پک مسنے کہ ننا ایلم ملک یو اے ای اسہ ارب ڈالر اسٹیٹ بینک نا اکاؤنٹ اٹ جمع کرفینے و دادے فیڈرل ریزرو بینک کنفرمک رینے کہ دا پیسہ غاک پاکستان نا بینک اٹ جمع مسنو۔ الحمدللہ اسہ ارب ڈالر آن ننا زرگزران اٹ پین گچینی بریک۔ اسحاق ڈار پارے کہ تدوک آ دے سعودی عرب اِرا ارب ڈالر اسٹیٹ بینک اٹ جمع کرفیسس‘ 14 جولائی آ نن پاکستان نا ریزرو ءِ جاری کینہ ہراٹی سعودی عرب و یو اے ای ہم ریزرو جاری کرینو اوفتے اوار کرسا رپورٹ جاری کینہ۔ ای داوخت آ وزیراعظم شہباز شریف، آرمی چیف جنرل عاصم منیر، پاکستان نا الس نا کنڈآن و تینا کنڈآن متحدہ عرب امارات نا منتوار اٹ کہ پاکستان ءِ سختی آن کشنگ کن تینا سنگتی نا شاہدی ءِ تسنے‘ منہ ہفتہ مست وزیراعظم یو اے ای آ ہناسس تو دا بابت او پاریسر کہ نن زوت دا ریزرو ءِ پاکستان ءِ ایتنہ و آرمی چیف نا دورہ نا وخت آ ہم او باور کرفیسر‘ ہراکان گڈ کنے معلومدار کننگا۔ داسہ ننا ریزرو 14ارب ڈالر آن کراس کیک۔

(آن لائن)