آئی ایم ایف آن وام رسینگ گمر نا ہیت اس اف، شہباز شریف

اسلام آباد: وزیراعظم محمد شہباز شریف پارینے کہ تعلیم نا مون آ دننگ آن شونداری ممکن ءِ، طالب علم آتے تعلیم دوئی کننگ کن وسیلہ غاتا فراوانی حکومت نا زمواری ءِ، ہمسایہ ملک آک شونداری ٹی ننے آن مون آ ہِنار، نن پدی سلیسونن، تینا گوہوک آ ہند ءِ دوئی کینہ، آئی ایم ایف آن وام تا دوئی کننگ گمر نا ہیت اس اف، چرت انا ہیت اسے، چین و سعودی عرب مشکل اٹ ننادو ءِ ہلکنو، متحدہ عرب امارات آن اسہ ارب ڈالر ہم رسینگانے، سیاستدان، جج، جرنیل، ڈاکٹر و ایلو بشخ آتیان تعلق تخوک آ چاہندار آک ملک انا تقدیر ءِ بدل کننگ کن مون آ بریر۔ داخیال آتا درشانی ءِ او چارشنبینادے آ داڑے پاکستان ایجوکیشن انڈوومنٹ فنڈ و قومی نصاب اٹی اصلاحات نا بنانا دود آن تران کرسا کرے۔ داوخت آ بنجائی وزیر تعلیم و کسبی تربیت رانا تنویر حسین، وزیراعظم نا خصوصی کمکار امور نوجوانان شزہ فاطمہ و سیکرٹری ایجوکیشن وسیم اجمل آن بیدس طالب علم آتا بھلو کچ اس ساڑی ئسر۔ وزیراعظم پارے کہ اینو کنکن بھاز خوشی نا دے اسے۔ ہمو بشخ ہرانا کمک اٹ دنیا شون ہلکنے ہموڑکن داڑے نن ساڑی اُن۔ 2008 اٹی پنجاب آن نن دا سفرنابناءِ کریسن۔ تعلیم نا کمک اٹ دنیا شون ہلکنے۔ ڈاکٹر امجد ثاقب نا مشورہ غا 2008 اٹی انڈوومنٹ فنڈ اس جوڑ کریسن و ہمووخت آ 2 ارب روپئی جتا کریسن و داڑان 4 لکھ آن زیات بھاز قابل، خواری کش و ہُشار طالب علم آتے تعلیمی وظیفہ تننگاسس ہرااوکان پد ڈاکٹر، انجینئرو ایلو بشخ آتیٹی اوفک نمان کاریم سرتسر۔ دا وظیفہ غاتیان ہزار آ نیزگار طا لب علم آک تینا تعلیم ءِ پورو کریر۔ وزیراعظم پارے کہ نن قوم انا کروڑ آ مار و مسن تیا تینا مالی وسیلہ غاتے خڑچ کتون تو دا سفر نیمہ گڈلوسلک۔ برجاسال 14 ارب روپئی انڈوومنٹ فنڈ اکن جتا کننگانے ہرا اگر چہ کم ءُ ولے ننا مالی مشکل آک بھاز زیات ءُ۔ مدام تعلیمی وظیفہ غاتے ودفنگ نا کوشست کرین۔ نن فیصلہ کرینن کہ برجاسال اٹی جتا 3 ارب روپئی ءِ نیزگار طالب علم آتے تننگک۔ نن خوانہ کہ دا زر بروک آ 10 سال آتیٹی 14 ارب آن ودسا 40 ارب اسکان سرمرے تانکہ ننا طالب علم آک تینا تعلیم نا چرجوئی ءِ پورو کننگ کیرہ۔ اللہ تعالیٰ پاکستان ءِ معدنی وا یلو قدرتی وسیلہ غاتے تسنے۔ مشکل دور بھاز زوت گدرینگک و پاکستان اسہ سوگو ءُ ملک اس جوڑ مریک۔ پاکستان ایجوکیشن انڈوومنٹ فنڈ آ ملک انا طالب علم آتا حق ءِ۔ وزیراعظم پارے کہ ملک اٹی لکھ آ ہندن ءُ چناارے ہرافتتون وسیلہ اف ولے او ڈاکٹر، انجینئر جوڑ مرسا تینا خاہوت و ملک انا پن ءِ روشنا کننگ نا عزم تخرہ۔ ہراعلاقہ شونداری نا رُمب اٹی پدی ءِ اوفتیا چکار کننگے۔ وزیراعظم پارے کہ اگہ حکومت و صاحب ثروت بندغ آک نیزگار مار و مسن تا دوتے ہلپسہ تو نئے دا دنیا ٹی و نئے بروک آ دنیا ٹی اوفتے کن معافی مریک۔ تعلیم و فنی تعلیم آ چکار کننگ نا گرج ءِ۔ انفارمیشن اینڈ ٹیکنالوجی، آرٹیفیشل ٹیکنالوجی، کشت وکشار، میڈیکل سائنس و ایلو بشخ آتیٹی مون آ ہِننگ نا بھلو گنجائشت اس ارے۔ پوسکن آ ٹیکنالوجی نا کمک اٹ کشاری بشخ اٹی پیدوار ءِ ودفنگ نا کوشست کننگ مریک۔ وخت بسنے کہ تعلیم آ پورو چکار کننگے۔ حکومت نا مد 14 اگست آ پورو مریک۔ اوکان پد اکتوبر یانومبر اٹی گچین کاری مریک۔ الیکشن کمیشن داناپڑو ءِ کیک ولے تعلیم بروک آ حکومت نا اولیت مرے۔ وزیراعظم پارے کہ آئی ایم ایف نا بورڈ انا دیوان اینو مننگ ءِ و اومیت ءِ کہ داٹی ننا وام تا منظوری مریک۔

(اے پی پی)