مالداری ءِ پوسکن آ دور اتون ہم گرنچ کننگ نا گرج ءِ، گورنر بلوچستان

کوئٹہ : گورنر بلوچستان ملک عبدالولی خان کاکڑ پارینے کہ ملکی زرگزرانی ءِ سوگو کننگ کن کشت وکشار و مالداری نا بشخ آتے شون تننگ نا بابت صوبائی دارالحکومت کوئٹہ ٹی اسہ قومی کہول انا سیمینار اس اڈ تننگ ناگرج ءِ‘ داہیت ءِ یقین اٹ کننگ مریک کہ اگہ نن مالداری سیکٹر ءِ پوسکن آ خواست آتتون ہمگرنچ کننگ اٹ سرسہب مسن تو بیرہ بلوچستان سعودی عرب نا 25لکھ حاجی نا عئیدقربانی نا گرج آتے پورو کننگ کیک۔ ہندا سوب آن المی ءِ کہ حکومت مچ آ صوبہ نا مالدار و کشارگر تتون پبی کمک و راہشونی فراوان کے‘ کشار گر تے اڑزان بجلی و آب اٹو بج انا فراوانی تون اوار مالدار تیکن سہدار تیکن ویکسین، کن وخور کن جوان ءُ گڑا و آب اٹو دوائی فراوان کے۔ دا خیال آتا درشانی ءِ او گورنر ہاؤس کوئٹہ ٹی صوبائی اسمبلی نا باسک اصغر ترین ناکماشی ٹی کشارگر تا ڈل و بلوچستان ایگریکلچرل ریسرچ اینڈ ڈویلپمنٹ سینٹر نا ڈائریکٹر جنرل ندیم صادق تون جتا جتا اوڑدہی ناوخت آ ہیت وگپ کرسا کرے۔ گورنر بلوچستان کیسکو ءِ پرمان کرے کہ او کشارگر تیکن دمدستی کل کشاری فیڈرتے پورو وولٹیج اٹ بجلی فراوان کے‘ اوپارے کہ پاکستان وخاص وڑ اٹ بلوچستان نا زرگزران بنداوی وڑ اٹ کشاری وڑاناءُ‘ بلوچستان اٹ زرگزران نا کل آن اہم و بھلا بشخ مالداری تون گنڈوک ءِ دا راست ءِ کہ بلوچستان قدرتی کاپچر تا گلزمین ءِ‘ داڑے ساہدار و چک آتا کیہی جوان انگا نسل آک اریر و داٹی لائیو اسٹاک و ماہی گیری ءِ پوسکن آ خواست آتتون ہمگرنچ کرسا دانا نشوونما نا کمک اٹ دادے انٹرنیشنل کہول آ کٹیا کروک واپاری نا وڑ اٹ شون تننگ مریک۔ سعودی عرب اٹ ہر سال عمرہ و خاص وڑ اٹ حج انا وخت آ عئید قربانی کن ہچ مف 25لکھ عئیدقربانی جتا جتا ملک آتیان بٹنگ انگک وخت اس کہ سعودی عرب نا دا گرج ءِ بیرہ بلوچستان تینا وسیلہ غاتیان پورو کننگ کیک۔ او پارے کہ بلوچستان نا پہوال آتا بارو اٹ دا ہیت آن است ہسون مریک کہ دا شون ہلوک دور اٹ ہم اوفتے زند انا بنداوی آسراتیک دوئی افس۔

(خ ن)