ژوب گریژن جلہو، 4 فوجی ورنا شہید، مسہ دہشتگرد خلنگار

راولپنڈی :  بلوچستان نا ضلع ژوب گریژن اٹ دہشتگرد آتا جلہو اٹ 4 فوجی ورنا شہید مسر‘ سکیورٹی فورس آک ورندی کارروائی ٹی مسہ دہشتگرد ءِ کسفیر‘ دہشت گرد آک گریژن اٹ پترینگ نا کوشست کریر ڈیوٹی آساڑی سکیورٹی کارندہ غاک دہشت گردآتا کوشست ءِ بے سہب کریر۔ ترجمان آئی ایس پی آر نا رداٹ دا وخت اسکان سلہہ بند 3 دہشت گرد خلنگانو‘ وخت اس کہ ایلو دہشت گردآتے اسہ چنکو علاقہ سے ٹی گھیڑ کننگانے‘ شہادت آک دہشت گرد آتے ہلنگ کن برجا کلیئرنس آپریشن نا وخت آمسر۔ آئی ایس پی آر پارینے کہ کلیئرنس آپریشن نا وخت آ 4 فوجی ورنا شہید مسر وخت اس کہ پین پنچ بھاز ٹھپی مسر۔ آئی ایس پی آر مستی پارے کہ سکیورٹی فورس آک بلوچستان وپاکستان نا امن ءِ بھس کننگ نادا وڑ انا کوشست آتے بے سہب کننگ کن پرعزم ءُ۔ ایلو کنڈآ ایس پی ژوب پارینے کہ دہشتگرد آک راکٹ لانچر وایلو سلہہ غاتے ٹی جلہو کریر ہرانا سوب آن چار شاری ہم ٹھپی مسنو۔ پاک فوج علاقہ ٹی آپریشن کننگ اٹی ءِ‘ علاقہ ءِ سیل کننگانے۔ وزیراعلیٰ بلوچستان میر عبدالقدوس بزنجو ژوب گریژن اٹ دہشت گرد آتا جلہو نا مذمت ءِ کرسا دمدستی ردعمل نا کمک اٹ دہشت گرد آتا جلہو ءِ بے سہب کننگ آ پاک فوج ءِ خراج تحسین پیش کرینے‘ وزیراعلیٰ پارینے کہ پاک فوج انا ورناک جلہوکروک دہشت گرد آتا ارادہ ءِ بے سہب کرسا اوفتے اوفتا ایسر آسر کریر۔ وزیراعلیٰ پارے کہ وطن عزیز نا رکھ ءِ کرسا پاک فوج انا چار ورنا تینا جان تے ندر کرسا شہادت نا رتبہ ءِ دوئی کریر‘ نن تینا شہید آتیا گمر کینہ‘ ننا نرزور فوج ملک وقوم انا رکھ اکن پرعزم ءِ‘ وزیراعلیٰ پارے کہ پاک فوج ملک انا امن وسلامتی نا ضامن ءِ‘ وزیراعلیٰ وطن نا شہیدآتا خاہوت آتتون ہڑزخواہی و یکجہتی نا درشانی کرسا پارے کہ مچ آ قوم شہید آتا خاہوت آتتون سلوک ءِ‘ وزیراعلیٰ ٹھپی سکیورٹی کارندہ غاتا زوت دراخ جوری کن نیک انگا استخواہی تا درشانی ءِ کرے۔ وزیراعلیٰ بلوچستان میر عبدالقدوس بزنجو ژوب اٹ دہشت گردآتا جلہو آن ودی مروک حالیت آتیان معلومداری دوئی کرے و ایڈیشنل چیف سیکرٹری داخلہ آئی جی پولیس و کمشنر ژوب آن معلومداری ہلک‘ وزیراعلیٰ نا کنڈآن کانود نافذ کروک کل صوبائی ادارہ غاتے جلہوکروک دہشتگرد آتا برخلاف کارروائی ٹی پاک فوج ءِ کمک فراوان کننگ نا پرمان کننگا وخت اس کہ وزیراعلیٰ اے ٹی ایف و لیویز کیو آر ایف ءِ دمدستی ژوب آراہی کننگ ناپرمان ہم کریوزیراعلیٰ نا کنڈآن پی ڈی ایم اے ءِ ہم خصوصی ٹیم ژوب آ راہی کننگ نا پرمان کننگانے۔گورنر بلوچستان ملک عبدالولی خان کاکڑ ژوب گریژن آ دہشتگرد آتا جلہو اٹ سکیورٹی کارندہ غاتا شہیدی و ٹھپی مننگ آ ڈکھ وارمان کرینے‘ تینا مذمتی بیان اٹ گورنر بلوچستان شہید آتا خاہوت آتتون ہڑزخواہی و یکجہتی نا درشانی ءِ کرسا پارے کہ نن کل نما غم اٹ بریبر نا شریدار ان۔ گورنر بلوچستان شہید آتا مغفرت و ٹھپی تا زوت دراخ جوڑی کن دعا کرے۔چیئرمین سینٹ محمد صادق سنجرانی بلوچستان نا علاقہ ژوب اٹ سیکورٹی فورس آتیا دہشت گرد جلہو نا مذمت ءِ کرینے‘ تینا مذمتی بیان اٹ چیئرمین سینٹ دہشت گردآتا جلہو اٹ شہید مروک کارندہ غاتا خاہوت آتتون ہمدردی و ہڑزخواہی کرے او دہشتگرد جلہو اٹ ٹھپی مروک سکیورٹی کارندہ غاتا زوت دراخ جوری کن دعا ہم کرے۔ چیئرمین سینٹ پارے کہ دہشت گرد آک شونداری ناعمل ءِ توننگ خوارہ ہراٹی او ہچ گہس سرسہب مفسہ۔ دہشت گردی نا برخلاف جنگ اٹ پاکستان نا سکیورٹی فورس آک بھاز قربانی تسنو‘ ڈیہہ انا امن کن سکیورٹی فورس آتا قربانی بے بھرم ہنپسہ۔ ڈپٹی چیئرمین سینٹ مرزا محمد آفریدی ہم سکیورٹی فورس آتیا جلہو نا مذمت ءِ کرینے۔ ڈپٹی چیئرمین سینٹ ہم دہشت گرد آتا جلہو اٹ شہید مروک کارندہ غاتا خاہوت آتتون ہمدردی و است ہسونی نا درشانی کرسا ٹھپی کارندہ غاتا زوت دراخ جوڑی کن دعا کرینے‘ اوپارے کہ دہشت گرد آک مچ آ انسانیت نا دشمن ءُ پاکستان دہشت گردی نا ناسور ءِ چٹفنگ کن پرعزم ءِ۔

(آن لائن/ خ ن)