اسلام آبادہائیکورٹ،عمران خان نا عبوری ضمانت منظور

اسلام آباد : اسلام آباد ہائیکورٹ چیئرمین پی ٹی آئی عمران خان نا القادر ٹرسٹ کیس اٹ اِرا ہفتہ کن عبوری ضمانت ءِ منظور کرے وخت اس کہ عدالت 17 مئی اسکان عمران خان ءِ پین اسہ مقدمہ سے ٹی دزگیر کپننگ نا پارت کرے۔ حوال نا رد اٹ اسلام آباد ہائیکورٹ نا جسٹس میاں گل حسن اورنگزیب نا کماشی ٹی جسٹس ثمن رفعت امتیاز آ ساڑی ڈویژنل بینچ اسہ گھنٹہ اس ہُرے آ القادر ٹرسٹ کیس اٹ عمران خان نا ضمانت نا درخواست آ سماعت نا بناءِ کرے۔ عمران خان اسلام آباد ہائیکورٹ اٹ پیش مس‘ ہندا وخت آ کمرہ عدالت اٹ ساڑی اسہ وکیل اس عمران خان کن نعرہ خلک ہراڑا جسٹس میاں گل حسن ترند مس و پارے کہ دا وڑ امر سماعت کننگ کینہ‘ عدالت نا شرف بھاز المی ءِ‘ پی ٹی آئی نا وکیل پارے کہ نعرہ خلوک آ وکیل ننے آن اف ولے سماعت کروک آ بینچ بش مس ہنا و جمعہ نماز نا وقفہ کننگا۔ وقفہ غان گڈ سماعت بنا کرے تو عمران خان کانودی ٹیم اتون اوار عدالت اٹ ساڑی ئس‘ ضمانت نا درخواست آتیا عمران خان نا وکیل خواجہ حارث دلیل تس کہ عمران خان ءِ 9 مئی آ بائیو میٹرک برانچ آن دزگیر کننگا۔ عمران خان ءِ دزگیر کننگ آن پد اودے انکوائری رپورٹ نشان تننگا‘ ہراوڑ القادر ٹرسٹ نا انکوائری ءِ اناگت انویسٹی گیشن اٹ بدل کننگا دانا مسخت دا ئس کہ عمران خان ءِ دمدستی دزگیر کننگے‘ انکوائری ٹی اگہ مٹیریل مرے گڑا نیب انکوائری ءِ انویسٹیگیشن اٹ بدل کننگ کیک۔ عدالت سوج کرے کہ گڑا دا کیس اٹ نمے سوجی لڑ تننگا؟ خواجہ حارث پارے کہ سوجی لڑ آخا بیرہ نوٹس جاری کننگا۔ عمران خان آ انکوائری نا وخت آ 2 مارچ آ کال اپ نوٹس راہی کننگا۔

(آن لائن)