عمران ءِ بچفنگ کن عدالت سُرف انا دیوال جوڑ ءِ، وزیر اعظم

اسلام آباد : وزیراعظم شہباز شریف پارینے کہ ملک بھاز مشکل وخت آن گدرینگ انگ ءِ‘ چیلنج آک میرات اٹ رسینگار‘ہرافتتون مون تننگ کن کابینہ کوشست کننگ اٹی ءِ‘ عمران نیازی ءِ بچفنگ کن عدالت آہنی ءُ دیوال اس جوڑ مسنے‘ وخت دُن مسنے کہ دوبہ دار اس عدالت آ برے و جج اودے پائے کہ نے تون ملنگ آن ای بھاز خوش مسٹ۔ چیف جسٹس سپریم کورٹ عمران خان ءِ کرپشن اٹ این آر او تس و تینا ’لاڈلا‘ نا کرپشن نا رکھ ءِ کننگ اٹی ءِ‘ حکومت آئین آ سختی اٹ عمل کیک‘ پد تے انت کہ مرے اوفتتون مون ایتک۔ او پارے کہ کہ عمران نیازی ءِ دھاندلی اٹ وزیراعظم جوڑ کننگاسس، اودے اتوک آتا مسخت غٹ ءِ دُز داڑیل گوندفنگ ئس، عمران نیازی ءِ 10 سال اسکان بیٹ کننگ نا سجفنگاسس، پی ٹی آئی سرکڑدہ غاک ملک ءِ بھس کریر، عمران نیازی نا برخلاف مقدمہ غاتے شجر ممنوعہ گوندنگا، اگہ عمران خان خائن و بددیانت اف تو عدالت اٹ تینا بے گناہی ءِ پک کے، دوآبہ خان انصاف نا جنازہ پیش تمانے۔ جمعہ نادے آ بنجائی کابینہ نا دیوان اٹی گپ وتران کرسا وزیراعظم پارے کہ عمران خان نیازی دروغ انا پروپیگنڈا غان قوم ءِ تقسیم کرے و ہرجاگہ غا زِیار تالان کرے، عمران نیازی امریکہ تون تعلقداری تے خراب کننگ اٹ اسہ کسر اسے ہم اِلیتو، نن پاکستان نا سفارتی پڑآ دنیا تون تعلقداری تے گچین کننگ کن گام گیج کرین، حکومت میرات اٹی ملوک آ ویل و چیلنج آتا مون ءِ توننگ کن حتی المقدور کوشست کننگ اٹی ءِ، ملک بے کچ مشکل حالیت آتیان گدرینگ انگ ءِ، آئینی وڑاٹ گچین ننا حکومت ءِ امریکی سازش گوندنگا، عمران خان و اونا حواریک بے شرمی اٹ دروغ تڑسا کریر، پی ٹی آئی حکومت اٹ ارب آ روپئی نا کرپشن آ کس اس ورندی خواتو بلکن مالم جبہ، بلین ٹری سونامی و بی آرٹی کون آ کرپشن نا کیس آتیٹی اودے کلین چٹ تننگا و دا مقدمہ غاتے شجرممنوعہ گوندنگا وخت اس کہ مسکوہی وزیراعظم نواز شریف ءِ پانامہ نا راگ و اقامہ نا مقدمہ ٹی سزا بِنفنگا۔ اوتینا مسڑتون اوار عدالت آتتون مون تس، آصف علی زرداری نا ایڑھ ءِ نوک انا نن ہسپتال آن ہرفسا دزگیر کننگا، اینو نیب انا غبن و کرپشن نا مقدمہ ٹی عدلیہ عمران خان کن آہنی دیوال اس جوڑ مس وخت اس کہ ننا مقدمہ غاتے ہندن آن ہندن اِلنگاکہ، سال سال اسکان ضمانت نا درخواست آ خف توننگتوکہ، نن صبر اٹ غٹ مقدمہ غاتا عدالت آتیٹی مون تسن۔ وزیراعظم پارے کہ عمران نیازی نا مسخت آئی ایم ایف ڈیل ءِ چٹفنگ و پاکستان ءِ زرگزرانی وڑاٹ بھس کننگ ئسک، نیب نیازی گٹھ جوڑ زرکارآتے نرفے۔ وزیراعظم پارے کہ عمران نیازی حساس تنصیب آتیا جلہو کرفے، اگہ عمران خان خائن و بددیانت اف تو عدالت اٹ تینا بے گناہی ءِ پک کے۔

(اے پی پی/ آن لائن)