پی ڈی ایم نا دوشنبے آ سپریم کورٹ نا مون آ برانز و دھرنا نا پڑو

اسلام آباد : پی ڈی ایم نا سروک مولانا فضل الرحمان سپریم کورٹ نا داسہ نافیصلہ غاتا برخلاف دوشنبے نا دے عدالت عظمیٰ ناپیشن آ برانز و دھرنا تننگ نا پڑو کرے و پیدوار کرینے کہ مچ انا ورندی ءِ مچ و لٹ انا ورندی لٹ اٹ تننگک‘ کل گڑاتے عمران خان کن بھس کننگانے‘ نن مسٹ ارٹ آخا چار مسٹ نا فیصلہ ءِ مننہ‘ سپریم کورٹ ڈوہدار ءِ سزا تننگ نا جاگہ غا رکھ تننگ اٹی ءِ۔ پی ڈی ایم نا سروکی دیوان آن پد پریس کانفرنس کرسا مولانا فضل الرحمان پارے کہ ننا سپریم کورٹ ڈوہدار ءِ سزا تننگ نا جاگہ غا اودے رکھ تننگ اٹی ءِ‘ ہمو وخت ہراتم عمران خان ءِ دزگیر کننگا‘ 60ارب نا کرپشن کیس اٹ تو سپریم کورٹ دا بابت اودے آسراتی فراوان کروک آتا است بڑزائی ءِ کرے و اینو ہائی کورٹ ہم ہرا فیصلہ ءِ تسنے کہ 9 مئی آن پد ہرا واقعہ غاک مسنو دا بابت ہچ ءُ مقدمہ سے ٹی کارروائی کننگپ۔عمران خان نا برخلاف اسہ مقدمہ سے ٹی دزگیری کننگپ‘ داڑ اسکان پاننگانے کہ‘ اگہ مقدمہ سے نا سما مف تو اوٹی ہم دزگیر کننگپ‘ داڑان کساس مریک کہ ننا عدلیہ ہراڑے سلوک ءِ و ہرا وڑ آئین وکانود آن چَپ فیصلہ تننگ انگ ءِ۔ مولانا فضل الرحمان پارے کہ مگہ دا رعایت مسہ وار وزیراعظم مروک میاں نواز شریف ءِ تننگا‘ ہراتم اونا اُرائی آئی سی یو ٹی ہنا تو منت زاری آن پد ہم فون اکن ہم موکل تننگتو‘ ہراتم پد تینا سیل آہنا تو مسہ گھنٹہ غان گڈ حوال تننگا کہ اونا اُرائی کزیت کرینے‘ مگہ دا وڑ انا مریم نواز، فریال تالپور ءِ تننگا۔ او پارے کہ اینو ہرا وڑ عمران خان ءِ وی وی آئی پی پروٹوکول تننگ انگ ءِ‘ مچ آ ملک اٹ غنڈہ گردی دہشتگردی مننگ اٹی ءِ۔ سپریم کورٹ اوفتے رکھ تننگ اٹی ءِ‘ کور کمانڈر ہاؤس، جی ایچ کیو آ جلہو مننگ اٹی ءِ‘ وطن کن جان ندر کروک آتا یاتگیری تے کشنگ انگ ءِ‘ ریاستی ادارہ غاتا ہرا وڑ توہین ءِ کننگ انگ ءِ عدالت اوفتے رکھ تننگ اٹی ءِ‘ داسہ نن فیصلہ کرینن کن سپریم کورٹ نا رویہ نابرخلاف برانز کننگک۔ ای پی ڈی ایم نا سرکڑدہ غاتا نمائندگی ءِ کرسا مچ آ قوم آن خواست کیوہ کہ دوشنبے نا دے مچ آقوم اسلام آباد کن راہی مرے۔ سپریم کورٹ ناپیشن آ بھلو دھرنا اس تننگک و اوفتے پاننگک کہ سپریم کورٹ مدر آف لاء ءِ‘ مدر ان لاء اف‘ دا آسمان آن بتنو‘ دا ہم ننے آنبار ءُ انسان ءُ۔ آئین آن ہراڑاسکان پیشن کارہ۔ او پارلیمنٹ نا ہم پرواہ ءِ کپسہ۔ مولانا فضل الرحمان مستی پارے کہ نن پیدوار پانہ کہ چیف جسٹس صاحب خف تو نن مسہ جج انا فیصلہ ءِ بننگ کن تیار افن‘ داسہ نی ازخودنوٹس ہلنگ کپیسہ‘ پارلیمنٹ کانود پاس کرینے۔ اینو کل انا امنائی آفیصلہ ءِ کہ دوشنبے نادے سپریم کورٹ نا پیشن آ دھرنا تننگک۔ننا دھرنا پرامن مریک‘ برانز پرامن مریک۔ داکان مست ہم نن اسلام آباد آ بسن ولے نن کانود آن چَپ کاریم کتون‘ ولے دا ہیت ءِ یات تخنگے کہ اگہ کس اس ننے آ دو ہرفنگ نا کوشست کرے تو ولدا لٹ اٹ ورندی تننگک۔ اسہ سوج اسے نا ورندی ٹی مولانا فضل الرحمان پارے کہ ای حکومت نا آخا پی ڈی ایم نا ہیت ءِ کننگ اٹی اٹ‘ پی ٹی ڈی ایم اسہ سیاسی ءُ پلیٹ فارم اسے ای نمے اونا فیصلہ غان معلومدار کریٹ۔

(آن لائن)