لاہور جناح ہاؤس آ جلہو کروک آتا پدرند ءِ خلنگ نا چر برجا

لاہور : لاہور اٹ جناح ہاؤس آ جلہو کروک آ شرپسند آتا پد رند ءِ خلنگ نا چر برجاءِ‘ کانود نافذ کروک ادارہ غاک جناح ہاؤس وایلو فوجی ملیت آتیا جلہو کروک آتیان منہ شر پسند نا پد رند ءِ خلکنو‘ ہندا شرپسند آتا برخلاف انسداد دہشتگردی نا رد اٹ ایف آئی آر درج کننگانے۔ حکومتی حوالی نا رد اٹ جناح ہاؤس وایلو فوجی ملکیت آتیا جلہو کروک ایلوفتا پدرند ءِ خلنگ نا چربرجاءِ‘ جناح ہاؤس ءِ خاخ تننگ‘ خلنگ پرغنگ‘ و نہادی و دستاویز آتے دزی کروک شرپسند آتا برخلاف کانودی کارروائی نا بناءِ کننگانے۔ کور کمانڈر ہاؤس ءِ خاخر تننگ و بیدادی نا کارروائی تے ٹی بشخ ہلوک آتیان دا وخت اسکان گیشتری بندغ آتا پدرند ءِ خلنگانے‘ دا شرپسند آتا برخلاف انسداد دہشتگردی نا رد اٹ ایف آئی آر درج کننگانے‘ دزگیر شرپسند آتے ٹی اویس مشتاق ولد محمد مشتاق سکنہ اوکاڑہ، عباد فاروق ولد امانت علی سکنہ لاہور، محمد حاشر خان ولد طارق بشیر سکنہ لاہور و جہانزیب خان سکنہ کیولری گراؤنڈ لاہور نا پدرند ءِ خلنگانے‘ دا بیدادی کروک کارندہ غاتتون سلہہ‘ آتشی سلہہ‘ لٹ‘ خل‘ پٹرول بمب ئس‘ داڑتون اوار ہندن انگا ایلو بندغ آک ہرافک ملک اناایلو علاقہ غاتے ٹی ملکی ملکیت آتے نسخان رسیفیر اوفتے ہم دزگیر کننگ انگ ءِ۔ ایلو کنڈ آ بنجائی وزیرداخلہ رانا ثناء اللہ پارینے کہ عدالت انت کہ پرمان کرینے اودے پورو کننگک‘ قومی خزانہ ءِ ارب آروپئی تا نسخان تروک آءِ ویلکم کننگ انگ ءِ‘ ’لاڈلا‘ ءِ کمک تننگ انگ ءِ‘ ملکی حالیت آتیا قومی سلامتی کونسل نا دیوان دوشنبے یاسَے شنبے آ مریک۔ میڈیا تون ہیت وگپ کرسا او پارے کہ ایمرجنسی خلنگ نا ہچ ءُ فیصلہ اس متنے‘ قومی خزانہ ءِ نسخان رسیفوک آئے بخیر کننگ انگ ءِ‘ اونا رکھ انا بست وبند ءِ کننگ انگ ءِ‘ پوسکن آ کمکاری متوکہ تو حالیت آتا مون ءِ اِرا مسہ دے اٹ تورینہ۔ او پارے کہ عدالت ناکنڈآن دوبہ دار ءِ بخیر کننگ انگ ءِ‘ دا حالیت آتے ٹی مذاکرات نا ہچ ءُ گنجائشت اس اف‘ اوپارے کہ خلنگ پرغنگ نا زموار تا پدرند ءِ خلنگانے‘ بھاز آتے درست کننگانے‘ کل دوبہ دار آتا برخلاف سخت کارروائی کننگ انگ ءِ‘ او پارے کہ عمران خان نا پاننگ آ جلہو کننگانے۔ او پارے کہ لاڈلا نا رکھ ءِ کننگ انگ ءِ‘ او پارے کہ صدر مملکت منصب ءِ مِش تا کرے‘اونا کڑدار شکی گری ناسوب ءِ۔ اوپارے کہ قومی سلامتی کمیٹی نا دیوان دوشنبے یاسَے شنبے آ مریک۔

(آن لائن)