ڈیجیٹل میڈیا سیل منفی پروپیگنڈا تے تورک، عبدالعزیز عقیلی

کوئٹہ : ڈیجیٹل میڈیا سیل انا مسخت نئے بیرہ حکومت نا برخلاف منفی تنقید نا ورندی تننگ بلکہ حکومتی کارکڑد ءِ الس اسکان سر کننگ ءِ۔ سوشل میڈیا غا حکومت نا کنڈآن تنقید نا جوان ورندی و دمدستی تننگ مریک۔ ڈیجیٹل میڈیا سیل آن حکومتی کارکڑد اٹ نئے بیرہ گچینی بریک بلکہ محکمہ تعلقات عامہ بلوچستان ایلو صوبہ غاتا مون اٹ گچین کارکڑد نشان ایتک‘بجٹ کم مننگ آن پد ہم جوان کارکڑد نشان ترسا محکمہ حوالکاری گچین کاریم کننگ اٹی ءِ۔ دا ہیت آتے چیف سیکرٹری بلوچستان عبدالعزیز عقیلی ورلڈ بینک انا کمک اٹ محکمہ تعلقات عامہ ٹی جوڑ ڈیجیٹل میڈیا سیل انا بناءِ کننگ ناوخت آ کرے۔ داوخت آ سیکرٹری حوالکاری محمد حمزہ شفقات، صوبائی کوآرڈینیٹر جی پی پی راشد رزاق ڈائریکٹر جنرل تعلقات عامہ کامران اسد ڈائریکٹر محمد نور کھیتران و محکمہ ناایلو افسر آک ہم ساڑی ئسر۔ چیف سیکرٹری پارے کہ محکمہ حوالکاری نا کارکڑد ستا کڑزک ہرانا کریڈٹ سیکرٹری ڈی جی پی آر وافسر و کارندہ غاتیکن کاہک۔ چیف سیکرٹری مستی پارے کہ افسر آتا کسبی کاریمی کچ ءِ ودفنگ و اوفتا لائخی تے پین ودفنگ کن گام گیج کننگک۔ نظامات تعلقات عامہ نا آخبتی بنداو آ مالی ویل آتے ایسر کننگ کن جم ڈٹ بندی و پک حکمت عملی نا رد اٹ گام گیج کننگ انگ ءِ تاکہ اوفتے داکان پد ہچ ءُ مالی ویل اس مون تروک مف بلکہ کل امورک گچین وڑ اٹ چلینگسا کیر۔ ایلو صوبہ غاتتون محکمہ اطلاعات بلوچستان نا بجٹ ءِ بیٹ تننگے تو دا ہچ اس ہم اف‘ ولے داکان پد ہم محکمہ نا کارکڑد ستا و سفت کڑزک۔

(خ ن)