عمران خان ءِ چپ ترفوئی مسکہ تو 14 تُو مست کرینہ، مریم اورنگزیب

اسلام آباد: بنجائی وزیر حوالکاری و شینکاری مریم اورنگزیب پارینے کہ عمران خان مدام عدلیہ نا توہین ءِ کرے، وخت اس ہم کانود نا پاسداری ءِ کتنے، او تکک کہ کس اس اوڑان اِرفنگ کپک، عمران خان نا دزگیری کانود نا رداٹ ئسک، اوڑتون لس شاری کون آ سلوک مرے۔ ”سکائی نیوز“ ءِ تینا خصوصی انٹرویو ٹی بنجائی وزیر حوالکاری پارے کہ عمران خان آ کرپشن نا دوبہ غاک ئسر، اونا دزگیری تون حکومت نا ہچ ءُ تعلق اس اف، دا دزگیری ءِ نیب کرے وکانود نا رداٹ ئسک۔ اسہ سوج اسے آ بنجائی وزیر حوالکاری پارے کہ نن سیاسی انتقام آ باور کپنہ، عمران خان ءِ دزگیر یا چپ کرفوئی مسکہ تو نن 14 تُو انتظار کتونہ۔ عمران خان نا نابودی نا بابت سوج انا ورندی ٹی بنجائی وزیر حوالکاری پارے کہ نن عمران خان ءِ نابود انت کن کرفنگ خوانہ؟ جمہوری حکومت اس داوڑانت اکن کیک؟ البتہ عمران خان تینا دور اٹی سیاسی راہشون تے دزگیرکرے، زندان تیٹی شاغا و اوفتا توار ءِ بند کننگ نا کوشست کرے۔ اسہ سوج اسے آ بنجائی وزیر حوالکاری پارے کہ عدالتی پرمان جاری مننگ آن پد دااونا آئینی حق ءِ کہ او دا آرڈر نا جاچ ءِ ہلے یا داڑا ہیت کے۔ اسہ پین سوج اسے آ بنجائی وزیر حوالکاری پارے کہ تدوک آ مسہ دے اٹی اسہ ہم پرامن شاری اس سڑک آتیا الوکہ، بیرہ سلہہ جتھ و دہشت گرد ساڑی ئسر ہرافک ریاستی و السی ملکیت آتے نسخان تسر۔

(اے پی پی)