سی پیک آن ملک شون ہلیک‘حاجی محمدخان طوراتمانخیل

لورالائی : غریب آتا خذمت ءِ اولیت ایتنہ‘ رنگ ونسل انا فرق آن بیدس خذمت کننگ آباور کینہ۔ دا خیال آتادرشانی ءِ بلوچستان عوامی پارٹی نا بنجائی راہشون صوبائی وزیر صنعت و تجارت حاجی محمد خان طور اوتمانخیل عبدالرحیم خان کلب اٹ تینا فنڈآن غریب آتے راشن تننگ نا وخت آ سینئر صحافی میاں طاہر بشیر و محکمہ اطلاعات نا محمود بلوچ تون ہیت وگپ و گورنمنٹ انٹر کالج ناصرآباد نا تعمیراتی کاریم ناجاچ ءِ ہلنگ ناوخت آ الس آن تران کرسا کرے۔ دا وخت آ چیئرمین ضلع کونسل نا پندار اومیتدار و بلوچستان عوامی پارٹی نا ضلعی صدر اصغر خان اتمانخیل، خان شیرانی، ٹھیکیدار ستار کاکڑ، بلوچستان عوامی پارٹی علماء ونگ انا ضلعی صدر مولوی ابراہیم اتمانخیل و بلوچستان عوامی پارٹی نا ایلو راہشون و کارندہ غاک ہم ساڑی ئسر۔ داوخت آ صوبائی وزیر حاجی محمد خان طور اوتمانخیل نا فنڈآن 600 غریب اُراتے ٹی راشن بشخ وپانٹ کننگا‘ ہرافتے ٹی گرج اناگڑاک اوار ئسر۔ بلوچستان عوامی پارٹی نا بنجائی راہشون وصوبائی وزیر صنعت و تجارت حاجی محمد خان طور اوتمانخیل پارے کہ اینو نا کمکی دود غریب خاہوت آتا کمک کننگ کن اڈتننگاسس‘ ہراٹی سَد آغریب و حقدار خاہوت آتے راشن تننگا‘ راشن تننگ نا داعمل برجا سلک۔ حاجی محمد خان طور اتمانخیل پارے کہ ناصرآباد تون اوار لورالائی نا ایلو علاقہ غاتے ٹی پنچ انٹر کالج تفنگ انگ ءِ ہرافتا سوب آن دا علاقہ غاتا طالب علم آک میٹرک آن پد تینا تعلیمی چرجوئی ءِ برجا تخنگ کیرہ و او انٹر اسکان تینا خڑک انا علاقہ ٹی تعلیم دوئی کننگ کیرہ۔ او پارے کہ لورالائی و میختر تون اوار مچ آ حلقہ ٹی تعلیم‘ جانجوڑی‘ دیر‘ کشت وکشار نا ڈٹ آتیا کروڑ آروپئی تے خڑچ کننگ انگ ءِ‘ او پارے کہ ملک شونداری نا کنڈآ گام کننگ اٹی ءِ۔ سی پیک نا پورو مننگ آن بلوچستان شون ہلیک دا ننا بروک آ چین تے شونداری ناوارخواہی فراوان کیک‘ او پارے کہ بلوچستان اٹ قدرتی وسیلہ غاتیان فائدہ ہرفنگ نا کوشست کننگ انگ ءِ۔ او پارے کہ داکان مست بلوچستان ءِ ہر پڑ آ گوجالنگا ہرانا سوب آن داڑے غریبی و بے روزگاری زیات مس‘ او پارے کہ صوبہ ٹی انڈسٹری تے فعال کننگ کن گام گیج کننگ انگ ءِ ہراڑان کم کٹیا کروک بندغ آتے زیات فائدہ مریک۔

(خ ن)