الس نا ملکیت ءِ نسخان رسیفوک آتا برخلاف کارروائی کننگے‘ پی پی بلوچستان
الس و فوجی ملکیت آتے نسخان رسیفوک و ملک اٹ بے ایمنی و بے چیٹی تالان کروک آتتون رعایت کننگپ
کوئٹہ: پاکستان پیپلزپارٹی بلوچستان نا صدر میر چنگیز خان جمالی، جنرل سیکرٹری روزی خان کاکڑ، سیکرٹری حوالکاری سردار سربلند جوگیزئی ئسک پارینو کہ عمران خان نا دزگیری آن پد پی ٹی آئی نا جتھ آتا کنڈآن سرکاری ملکیت، حساس ہند آتیا توڑ پھوڑ، جلاؤ گھراؤ نا اخس کہ مذمت ءِ کننگے کم ءِ جلاؤ گھیراؤ و توڑ پھوڑ اٹ اوار زموار آتا برخلاف سخت کارروائی کننگے۔ پی پی پی بلوچستان نا میڈیا کوآرڈی نیٹر حیات خان اچکزئی نا کنڈآن جاری بیان نا رداٹ پاکستان پیپلزپارٹی نا راہشونک پارینو کہ عمران نیازی آ 60 ارب روپئی نا کرپشن نا کیس ءِ۔ نیب عمران نیازی ءِ غٹ کانودی خواست آتے پورو کننگ آن پد حراست اٹ ہلک۔ اوپارے کہ عمران نیازی نا دزگیری آن پد پی ٹی آئی نا سرکڑدہ غاتا پارت آ کارندہ غاک ہراوڑ سرکاری ملکیت، حساس ہند آتیا جلہو کریر اونا مستین اٹ ہچ ءُ درور اس ملپک۔ داڑان دا معلوم مریک کہ پی ٹی آئی اسہ سیاسی ءُ جماعت اس اف۔ اوفک پاریر کہ جلاؤ گھیراؤ و توڑ پھوڑ اٹی اوار زموار آک ہچ ءُ رعایت اسے نا حقدار افس اوفتے دزگیر کرسا سخت سزاتننگے تانکہ پین وخت اس حساس ہند وپاک فوج آ جلہو آتا کس اس جیرت کننگپ۔ اوفک پاریر کہ پاکستان نا تاریخ اٹی 9 مئی ءِ تہاردے انا وڑٹ یات تخنگک ہرادے عمران نیازی و اونا کارندہ غاک پاکستان دشمنی نا پاش آن پاش شاہدی تسر ہرادے دشمن 75 سال اٹی کننگ کتوکہ اوفتے عمران نیازی و اونا کارندہ غاک اسہ دے اٹی کرسا نشان تسر۔
(اے پی پی)