پٹ فیڈرکینال نا بھل سَفائی المی ءِ‘بشیراحمد بنگلزئی

نصیر آباد : کمشنر نصیرآباد ڈویژن بشیر احمد بنگلزئی پارینے کہ پٹ فیڈر کینال و اونا شفیکو شاخ تا سہی معنہ اٹ بھل سَفائی کرفنگ وخت انا گرج ءِ‘ دا جاگہ نا زمیندار تا آخبت و علاقہ نا زرگزران نا سیبو ہندا کینال سسٹم آٹے‘ بھل سَفائی ناعمل اٹ ڈیوالئی تے سگپنہ‘ ٹیکٹر اٹ بھل سَفائی کرفنگ نا بابت زمیندار تا گڑتی تے ایسر کننگے‘ کاریم اٹ سستی کروک آتا برخلاف کارروائی کننگک‘ زوت پٹ فیڈر کینال نا دورہ ءِ کرسا بھل سفائی نا عمل نا تینٹ جاچ ءِ ہلیوہ۔ دا خیال آتا درشانی ءِ او بھل سفائی نا بابت محکمہ ایریگیشن نا اڈ ہلوک دیوان آن تران کرسا کرے۔ دیوان اٹ ایڈیشنل کمشنر نصیرآباد ڈویژن علی محمد ہانبھی تون اوار محکمہ ایریگیشن نافسر آک ساڑی ئسر۔کمشنر بشیر احمد بنگلزئی پارے کہ پٹ فیڈر کینال نا کمک اٹ بھلو رقبہ اس آباد مریک وہ ہندا کینال تا کمک اٹ دا جاگہ ٹی کشاری پیداوار دوئی مریک‘ ہندا سوب آن کینال تا بھل سَفائی کرفنگ بھاز اہم ءِ۔ ڈی سلٹنگ آن کینال اٹ دیر انا گنجائشت زیات مریک و ٹیل انا زمیندار تے وخت آ دیر انا فراوانی مننگ کیک‘ ہندا سوب آن المی ءِ کہ بھل سَفائی نا عمل آ خصوصی چکار کننگے۔ بھل سفائی نا بابت ننے آ زمیندار تا غاوک رسینگ انگ ءُ ہرافتے ایسر کننگے۔ کمشنر پارے کہ پٹ فیڈر کینال کیرتھر کینال و ڈرنیج سسٹم آ سَد آ تا کچ اٹ بیلدار و پین ملازم تعینات ءُ اوفتیان کینالز سسٹم نا لٹ آتا پورو بحالی نا کاریم ءِ ہلنگے۔ حکومت بلوچستان اوفتے تنخواہ ایتک‘ ڈیوٹی کپروک آتا برخلاف کارروائی کننگے۔ کینال سسٹم نا سخت چاروکی کننگ محکمہ ایریگیشن نا بھلا افسر آتا زمواری ءِ۔ وزیر اعلیٰ بلوچستان میر عبدالقدوس بزنجو و چیف سیکرٹری بلوچستان عبدالعزیز عقیلی نا خصوصی استخواہی ناسوب آن کینالز سسٹم نا پورو بحالی کن بھلو پیسہ اس تننگانے ہندا سوب آن المی ءِ کہ دا پیسہ غاتے سہی معنہ اٹ کاریم اٹ اتنگے۔ حکومت نا کنڈآن بھل سفائی کرفنگ اونا زمیندار دوست پالیسی تادرشانی ءِ۔

(خ ن)