Azíz Baloc o Makbúl Sábrí

Dun to duniá faná ná já ase, xalkat vadí marek, zind kek, o valdá Xudá ná kunđ á inoí marek, vali mana bandaģ andun o am marera, ará tená kamál, unar mandí o taxlík ná savab án asiŧ to ráj e báz giŕá etira, amoŕe tená gicen á yát áte am illira.

O arátam o dá duniá ģán rusxat kera, to xalkat ofte báz ziát yát kek, aeno nan andun o irá azím o fankár Azíz Baloc o Makbul Ahmad Sábrí e yát kannińg un, aráfk músíkí ná duniá ŧí báz pin kaŧŧár, tená gít o naģma ģáte naná ráj aná zebáí joŕ karer.

Azíz Baloc Balocí bolí ná asi báz ballo fankár as ass, o tená anen á tavár aŧ Balocí bolí e gít, ģazal o lok naģma ģátá asi anduno o xazána as atá kare ará asi murģun o vaxt asiskán yát tixińgo, dáŕán xalkat fáida arfisá ino e.

Azíz Baloc ámbár ińgá suríla ińgá fankár vár vár vadí mafak, asi andun o ráj aseŧ aráŕe taxlík, taekík, ilm, fikr o músíkí o adab e xás o aemíat as dúí af, dá ráj aŧí Azíz Baloc tená muc zind aŧí músíkí o xás vaŕ aŧ Balocí músíkí e asi púskun o rańg o droşum as dúí karife.

Vali aráxas ka ballo kaol aná ao bandaģ as ass, ráj aŧí ode amoxaso jága as dúí mannińg kattav. Dá vaŕ avlíko vaŕ matane, o dá ballo vael ase án kam af ki asi ballo fankár as naná niám án ináne, vali naná ixbárk oná bárav aŧ singal xabar as am şenk kannińg ná xuárí kattavas.

Şáyad dáŕe ajnabí press e samá af ki Azíz Baloc der ass, o oná Baloc kaom o Balocí kin ant xizmat áko? Aga Azíz Baloc ná pen kaom yá zubán ase án taállukdárí massaka to oná bárav aŧ báz nivişta kannińgáka, oná xizmat átá sifat e kannińgáka, vali nane ŧí dun o raváj jágí matane.

Baloc press ná kael báz cunak e, oná vasíla o zaría ģák am kacc aŧo, valdá am Azíz Baloc e nan dá nivişt átá kumak aŧ xiráj peş kena o omet kena ki vaxt gidreńg ton avár avár oná aemíat aŧ vaddukí marek, o tená parisŧár o Baloc kaom aná ar bandaģ ná ust aŧ zinda salo e, oná naģma o gít ák nafrat ná duniá ŧí mer aná pull dasisá karor.

Tadok á afta ŧí múskí ná duniá ná asi pen azím o şaxsíat as Makbúl Ahmad Sábrí am fání á duniá e yala kare,  o asi azím o fankar as ass, o panjá ná diáí ŧí kavválí ná biná e kare, o tená ballá ílum Ģulám Faríd Sábrí ton avár Kavválí e asi púskun o vaŕ aseŧ berife.

O Eşíá ná ģuŧ án ballá kavvál ná vaŕ aŧ mon á bass, tená vaxt aŧ oná párok á kavválík ģazab ná assur, aeno am oná báz ińgá kavválík ust áte básifira, aeno án 17 sál must oná ballá ílum duniá e illáne. Dása tenaŧ am kazíat kare.

Oná kazíat án músíkí xás vaŕ aŧ kavválí ná asi anen o daor as esar mass, vali afsoz ná ít dáde ki dá laejanđ fankár ná am amoxas ust buŕzáí matav aráxas ki o kaŕzáka o Afríka ŧí kazíat kare, vali be zaok á ŕáj e dáná esás icc af ki oftá niám án axxas azím ińgá bandaģ ák ináno.