پاکستان نا زیبائی و سیکیورٹی تینا مَٹ تینٹ ئُِ‘شین واٹسن

کوئٹہ گلیڈی ایٹر نا گوازی گر پارینے کہ ٹورنامنٹ نا بنا جوان ئس ولے بدقسمتی آن ہمو مومنٹم ئِ اسہ وڑ توننگ اٹ بے سہب مسن۔ پاکستان سپر لیگ(پی ایس ایل) فائیو کن کوئٹہ گلیڈی ایٹرز نا ٹیم اٹ اوار آسٹریلوی کرکٹر شین واٹسن تینا جند انا او ٹیم انا کارکڑد آ اُست ہسونی نا درشانی ئِ کرسا پارینے کہ بدقسمتی آن نن پرفارم کننگ کپنہ۔ پی ایس ایل فائیو نا پوائنٹس ٹیبل آ دفاعی چمپئین کوئٹہ گلیڈی ایٹرز دا وخت آ گڈیکو یعنی ششمیکو نمبر آٹے۔ 9 میچ آتے آن پد کوئٹہ گلیڈی ایٹرز نا بیرہ 7 پوائنٹ ئُ۔ گڈیکو میچ کوئٹہ گلیڈی ایٹرز داسہ کراچی کنگز نا برخلاف گوازی کروئی ئِ۔ او دفاعی چمپئن کن ٹاپ فور اٹ جاگہ جوڑ کننگ دا وخت آ بھاز سخت خننگ انگ ئِ۔ پنی آ گوازی گر شین واٹسن پارینے کہ بدقسمتی اٹ نن ایونٹ اٹ جوان گوازی کننگ کتون۔ میچ آتا بنا بھاز جوان ئس ولے ہمو مومنٹم ئِ توننگ اٹ بے سہب مسن۔ او پارینے کہ ای دا سمجھوہ ایلو ٹیمک مالو آن سوگو مسنو۔ وخت اس کہ اوفک جوان ئُ گوازی اس ہم کننگ اٹی ئُ۔ دہن انگا حالیت آتے ٹی نن اُست ہسونی نا ہیت دادے کہ نن جوان گوازی کننگ اٹی افن۔ ولے نن کل اکن داٹی ہیل کننگ و آزموندہ دوئی کننگ کن بھاز آ گڑاک اریر۔ آسٹریلوی کرکٹر پاہک کہ دہن اف کہ بولر تا جوان پرفارم کپننگ نا سوب آن بیٹسمین تے آ پریشر ودنگ اٹی ئِ۔ جوان گوازی کپننگ نا سوب آن کل آ پریشر ارے۔ دُن اف کہ بیرہ ینگ بولر آک جوان گوازی کتوس داڑے آزموندہ کار و سینئر بیٹسمینک ہم پریشر اٹی بسر او جوان گوازی کننگ کتوس۔ شین واٹسن تدوک آ سیزن اٹ تینا کارکڑد ئِ سرسہب کرفنگ اٹ جوان کڑد ادا کریسس ولے دا وار اوفک جوان پرفارم کننگ کتوس۔ ہراوڑ اوفتے آ گمان کننگاکہ۔ او پارینے کہ ای اسہ وار ولدا ہمووڑ پرفارم کننگ خواہسٹہ ولے دہن کننگ کتوٹ۔ ای او وڑ تینا بشخ ئِ شاغنگ کتوٹ ہراوڑ کنے شاغوئی اس تے۔ واٹسن مالو پاکستان اٹ پی ایس ایل نا میچ آتے گوازی کننگ آن نمن مسوسس ولے تدوک آ سال او کراچی آ بس او داسہ اونا پاکستان نا بارواٹ ہیت آک بھاز بدل مسنو۔ او پارینے کہ ای خدو بیرہ کراچی ٹی اسٹ ولے پی ایس ایل فائیو نا سوب آن کنے مچ آ پاکستان اٹ پیری کننگ نا وارخواہی رسینگا۔ کراچی، لاہور، اسلام آباد و ملتان آ ہننگ نا ہم وارخواہی رسینگا۔ آسٹریلوی گوازی گر پارینے کہ پاکستان اسہ زیباو¿ ملک اسے۔ اونا سیکیورٹی بھاز شاندار ئِ۔ ننا بھاز جوان خیال ئِ تخنگ انگ ئِ۔ کنا زند انا دا جوان ئُ آزموندہ اسے۔ بیرہ کنا آخا وخت اس کہ ایلو درملکی گوازی گرتے کن ہم اسہ جوان ئُ آزموندہ اسے۔ پنی آ کرکٹر سر ویون رچرڈز کوئٹہ گلیڈی ایٹرز نا مینٹور ئِ او شین واٹسن سر ویون رچرڈز تون زیات آن زیات وخت گدریفک۔ دا بابت اٹ شین واٹسن پاہک کہ دا کنا زند انا بھاز یات گری ئُ کہ ای سر ویون رچرڈ تون ہیت کرسا اوڑان سوج ہم ہرفوہ وخت اسکہ اونا آزموندہ غاتے آن فائدہ ہرفنگ نا کوشست ہم کننگ اٹی اُٹ۔ ای خوش قسمت اسے اُٹ کہ اوڑتون اُٹ او اسہ پنی ئُ کرکٹر اسے اوڑتون اوار مننگ ننا کل انا سرسہبی ئِ۔ مستی شین واٹسن نا پاننگ ئس کہ ای اگہ تینا ہیت ئِ کیو تو کنے داڑے انٹرنیشنل سیریز مننگ اٹ ہچ ئُ شک اس اف، کرکٹرز ایسوسی ایشن، گوازی گرک یا کرکٹ آسٹریلیا نا انت سوچ ئِ کنے معلوم اف ولے ای اومیت کیوہ کہ پی سی بی و کرکٹ آسٹریلیا سیریز نا بابت اٹ ہیت وگپ کرور او آخبت اٹ ہم کرسا کرور۔ او پارینے کہ پاکستان اٹ سیکیورٹی بھاز گچین ئِ، کراو¿ڈ کرکٹ نا بابت اٹ بھاز جذباتی ئِ او اُلس میچ آتے ہننگ خوارہ۔