ملک ءِ نسخان تننگ خواپنہ، گچین کاری نا خواہندار اُن، عمران خان
ای تو دزگیر ئسٹ، بیداد برانز آتا زموار امر مننگ کیوہ؟ ای ہچ گہس بے چیٹی نا ہیت کتنٹ، پی ٹی آئی سروک
Get real time updates directly on you device, subscribe now.
اسلام آباد : سپریم کورٹ اٹ پیشی نا وخت آہیت وگپ کرسا عمران خان پارے کہ داڑے میڈیا ساڑی ءِ‘ کلہو تننگ خواوہ ای تو دزگیر ئسٹ‘ بیدادی تیا ساڑی برانز نا زموار ای امر مریوہ؟ عمران خان پارے کہ ای وخت اس ہم بے چیٹی نا ہیت کتنٹ‘ ملک اٹ بیرہ گچین کاری خواوہ‘ کل ءِ پاوہ کہ سرکاری و السی ملکیت آتے نسخان رسیفپبو۔ او پارے کہ کنے آن موبائل فون ءِ ہلکر کنے سما الو‘ ملک اٹ انت مس‘ ملک اٹ نئے نسخان خواوہ و نئے بے چیٹی‘ نن بیرہ گچین کاری خوانہ۔ عمران خان کارندہ غاتے پرامن مننگ نا پرمان کرے و عدالت ءِ پارے کہ کنے وار اس پولیس لائن و وار اس پین جاگہ دریر‘ کنے سما تمتو انت مسنے۔ ای نیب نوٹس نا ورندی تسوسٹ ملک اٹ آجو گچین کاری نا خواہندار اٹ۔ یات سلے کہ 9 مئی آ قومی احتساب بیورو (نیب) چیئرمین تحریک انصاف ومسکوہی وزیراعظم عمران خان ءِ اسلام آباد ہائی کورٹ نا دنگ آن القادر ٹرسٹ کرپشن کیس اٹ دزگیر کریسس ہراکان گڈ اودے ایلو دے آ پولیس لائن اٹ خلوک احتساب عدالت اٹ پیش کننگا ہراڑے عدالت اونا 8 دے انا ریمانڈ ءِ منظور کریسس ولے تدوک آدے سپریم کورٹ چیئرمین پاکستان تحریک انصاف (پی ٹی آئی) عمران خان نا دزگیری ءِ غیرکانودی گوندسا دمدستی یلہ کننگ نا پرمان کرے۔ عدالت عظمیٰ عمران خان ءِ اسلام آباد ہائی کورٹ آ دوارہ ہننگ نا پرمان کرے و پارے کہ ہائی کورٹ انت کہ فیصلہ کرے اودے کل ءِ امنا کروئی مریک۔
(مانیٹرنگ ڈیسک)