عمران خان آ بھلو دوبہ ءُ، تینا کابینہ تون ہم درو کرے، بلاول بھٹو

کراچی: وزیر خارجہ بلاول بھٹو زرداری پارینے کہ پی ٹی آئی تون اوار اسہ سیاسی جماعت اسے ءِ ہم کالعدم گوندنگ نا مخ تفی ءِ کپنہ‘ پی ٹی آئی آ رکھ خلنگ کن آئینی وکانودی وڑوڈول تینائی کروئی مریک‘ دا گڈیکو آپشن نا وڑ ساڑی ءِ‘ دزگیری تیا نئے خوشی کینہ و مٹھائی بشخنہ‘ انت کروئی ئس کرے داسہ بایدے تحریک انصاف پین خرابی کپ‘ کوشست کننگے کہ ہندن ءُ سیاسی ءُ وڑ اس پیش تمے ہراڑان ملک اٹ سیاسی سوگوی برے۔ کراچی ٹی پریس کانفرنس کرسا بلاول بھٹو پارے کہ سیاستدانک دزگیر مریرہ و مچ آ سیاست ءِ نسخان مریک نن وخت اس ہم خوشی کپنہ و نئے مٹھائی بشخنہ۔ پیپلزپارٹی اولیکو دے آن نیب انا برخلاف ءِ ولے پاکستان تحریک انصاف نیب انا رکھ ءِ کرسا بسنے۔ 2008 آن 2013 اسکان چارٹر آف ڈیموکریسی نا بشخ ئسن کہ نن نیب ءِ بند کینہ۔ عمران خان دادے ”مک مکا“ گوندا و نیب ءِ بچفنگ کن مہم نا بناءِ کرے۔ بلاول بھٹو پارے کہ پیپلزپارٹی نا نیب ترمیم تیان فائدہ دوئی کروک آ کل آن اولیکو سیاستدان تینٹ عمران خان ءِ‘ است ہسونی دادے کہ اوڑا کرپشن نا بھلو دوبہ ارے‘ او برطانیہ غان پیسہ اتنگ ناباندات اٹ تینا کابینہ تون دُرو کرے۔ ای پی ٹی آئی نا ہمو وخت انا کابینہ ٹی اوار کل باسک آتیان خواست کیوہ کہ او دا دوبہ غاتا تردید ءِ کیر۔ او پارے کہ نن میاں صاحب نا حکومت اٹ ہم پاریسن کہ نیب ءِ بند کننگے‘ ننا ہیت ءِ ہلتوس‘ اینو ننا سیوتیک ننا موقف آ بسنو‘ ننا کل انا خواست ئس کہ نیب ریفارمز کننگے‘ نن ریفارمز ایسن داسہ 90دے انا جاگہ غا 14 دے نیب انا بندی مننگ کیک۔ بلاول بھٹو پارے کہ داسہ نیب ریفارمز تیان عمران خان نا جند ءِ فائدہ مننگ ءِ۔ 190 ملین پاؤنڈ پاکستان نا پیسہ ءُ سندھ انا الس نا پیسہ غاک ءُ۔ عمران خان احتساب نا پن ہلوک ءُ وزیراعظم اس ئس‘ خان صاحب ءِ وارخواہی فراوان کننگا کہ او الس نا پلوک آ پیسہ غاتے پدی اتیک۔ وزیر خارجہ پارے کہ خان صاحب آ بھلو دوبہ ءُ‘ نن یا نمے آن کس دا ڈوہ انا زموار مسکہ تو نن جیل اٹ مسنہ‘خان صاحب دا گڑاغا سیاست کرے کہ ملک اٹ احتساب مرے‘ بایدے عمران خان دزگیر کننگوسس۔ چیئرمین پیپلز پارٹی مستی پارے کہ خان صاحب ءِ کانودو آئین نا رد اٹ کرپشن کیس تا سوب آن دزگیر کننگا‘ دزگیری آ بایدے پرامن برانز نا کال تننگوسس۔ تحریک انصاف مہالو آن فیصلہ کرے کہ ردعمل سیاسی مفک‘ خل‘ لٹ‘ توفک ہرفسا ریاست آ جلہو کننگا‘ دا وڑ انا جلہو تا کم درور رسینگک۔ بلاول بھٹو مستی پارے کہ پاکستان پیپلز پارٹی کوشست کرے کہ ملک اٹ گچین کاری مرے‘ نن کوشست کننگ اٹی ان کہ سیاسی جماعت آتا نیام اٹ ڈائیلاگ مرے‘ کنے اومیت ارے کہ ننا سیاسی ڈائیلاگ سرسہب مریک۔

(آن لائن)