ننا آئین عدل و انصاف نا ضمانت ایتک، پارلیمانی راہشون

اسلام آباد: قومی اسمبلی نا باسک آک پارینو کہ ننا آئین عدل وانصاف نا ضمانت ایتک، آئین، کانود آن ایڑتر گام گیج آک آئین ءِ لپی کریر، پنچ شنبے نادے آ قومی اسمبلی ٹی آئین نا گولڈن جوبلی بابت بین الپارلیمانی کنونشن آن تران کرسا قومی اسمبلی نا باسک خالد مقبول صدیقی پارے کہ جہانی امن ءِ داوخت آ پاکستان آن آخا ہندوستان آن خطرہ ءِ۔ ننے ہندوستان آن زیات پاکستان نا کنڈ آ چکار تروئی ءِ۔ اوپارے کہ آئین پاکستان نا پنجا سال پورو مسنے۔ پنجا سال نن پنجا آن کم ترمیم کرینن۔ دا ترمیم آتے قومی فائدہ غاتارداٹ کننگانے۔ ننا آئین نا مفاد عدل و انصاف نا ضمانت ایتک۔ قومی اسمبلی نا باسک محسن شاہ نواز رانجھا پارے کہ آئین پاکستان غٹ مذہب آتیان تعلق تخوک آتے حق فراوان کیک۔ آئین اٹ آخبت نا غٹ چیلنج آتا احاطہ ءِ کننگانے۔ اوپارے کہ پارلیمانی شرہ غاتیان آئین ءِ سرپند مننگ اٹ کمک ملک۔ اسلامی تعلیمات و آئین پاکستان نا رداٹ سگ صبر وتحمل راجی انصاف اقلیت آتا حق و کانود جی حکمرانی ءِ پک کننگ المی ءِ۔ قومی اسمبلی نا باسک سید نفیسہ شاہ پارے کہ پاکستان ءِ عدالتی، سیاسی، زرگزرانی و امن و ایمنی نا تنکی مون تروک ءِ۔ پارلیمنٹ عدالتی تجاوزنا برخلاف سلوک ءِ، ڈاکٹر نفیسہ شاہ پارے کہ آئین نا آرٹیکل 245 آ عمل مس، اِراصوبہ غاتیٹی فوج ءِ بٹنگ انگا، پاکستان اٹ جمہوری نظام نا رداٹ آئین اٹ نافذ ایمرجنسی کانود و آمرآتا کنڈآن بنداوی آجوئی تے معطل کرسا غیرکانودی گام گیج، ہڑتوم آ وڑانا ہلہلہ ئی کانود آ عملدرآمد تکلیف دہ ئسک۔ جمہوری حکومت آتیٹی ایمرجنسی کانود نا نفاذ اصلاحی وڑانا مریک، آمریت نا دور اٹی ایمرجنسی نا نفاذ آن نظریہ ضرورت نا فرسودہ نظام ءِ مون آ دننگا۔ مسکوہی قومی اسمبلی نا باسک آسیہ ناصر پارے کہ بنداوی حق آئین نا عین رداٹ ءِ۔ پاکستان نا آئین اٹی کیہی بدلی تے کننگانے۔ آئین نا مون آ غٹ نرینہ و نیاڑیک بریبر ءُ۔ مذہب نا آجوئی ہم بنداوی انسانی حق ءِ۔

(اے پی پی)