پارلیمنٹ ملک و الس نا ترجمان، کانود جوڑ کننگ ءِ توننگ مفک

اسلام آباد: سینیٹر مشاہد حسین سید پارینے کہ پارلیمنٹ تینا، ملک و الس نا ترجمانی ءِ کیک، سیاسی جماعت آتا نیام اٹ ہم گرنچی آئین آن ءِ، اقوام متحدہ نا منشور و جہانی کانود نا رداٹ ملک آتا نیام اٹ تعلقداری تا تعین و جھیڑہ غاتا ایسر ساڑی ءِ۔ داخیال آتا درشانی ءِ او پنچ شنبے نادے آ دستور پاکستان نا گولڈن جوبلی نا چرجوئی ٹی جہانی کنونشن آن تران کرسا کرے۔ جہانی کنونشن نا سرحال آئین اٹی چندی بحران تا چیلنج آتون مون تننگ نا بابت جتا امور ءِ۔ سینیٹر مشاہد حسین سید پارے کہ پاکستان وونٹ انا کمک اٹ جوڑ مس، پاکستان جمہوریت، کانود نا حکمرانی و آئین نا بنداو آ سلوک ءِ، ایگزیکٹیو کانود ساز و عدلیہ مسہ اہم تمبہ ءُ۔ اوپارے کہ غیر آئینی واکدارآتا نیام تمنگ آن ویل ودی مریک۔ اوپارے کہ پارلیمنٹ تینا ملک و الس نا ترجمانی ءِ کیک، سیاسی جماعت آتا نیام اٹ ہم گرنچی آئین آن ءِ۔ داکان بیدس کینیا نا پارلیمنٹ نا باسک فرح مالم محمد احمد پارینے کہ پارلیمان ءِ کانود جوڑ کننگ آن توننگ مفک، سیاست اینو کاروبار اس جوڑ مسنے، برانز آن ہچ ءُ گڑاس دوئی کننگ مفک۔ داخیال آتا درشانی ءِ او پنچ شنبے نادے آ دستور پاکستان نا گولڈن جوبلی نا بابت جہانی کنونشن آن تران کرسا کرے۔ اوپارے کہ انگریزآک کانود ءِ جتا جتا کتور، کنا حساب اٹ سہی جمہوریت اومان و کویت نا ءِ، کانود ءِ اگہ چٹفنگے ہم تو کانودسلک۔ اوپارے کہ ننے دُوارہ غلطی کننگ نا جاگہ غا اوڑان ہیل کننگ نا گرج ءِ۔ ملک اسے ٹی برانز آن ہچ ءُ گڑاس دوئی کننگ مفک۔ اوپارے کہ انت شام، عراق، صومالیہ ٹی امن ءِ؟ اگہ نم سوچرے کہ یورپ امریکہ نما کمک ءِ کیرہ تو داوڑااسُل اف۔ اوپارے کہ آئین حرف آخر اف، ننے مرے کہ نن تینا نمائندہ غاتے تینٹ گچین کین۔ نن تینا پیغمبر صلی اللہ علیہ و آلہ وسلم و حضرت عمرنا زند آن طرز حکومت ہیل کین، انسان ءِ سادہ زند ءِ گدریفنگے، اینو نا دور اٹی سیاست اسہ کاروبار اس جوڑ مسنے۔ اوپارے کہ امریکہ نا مڈل کلاس مخلوق چندی جاگہ غاتیان بروک آ مخلوق ءِ، ننا تینا قبیلہ و تپہ غاک ءُ ولدا ہم جنگ و جھیڑہ مریک، آئین اسہ زندہ جاوید کتاب اسے، پارلیمان ءِ کانود سازی آن توننگ مفک انتئے کہ پارلیمان نا کاریم کانود سازی نا ءِ، کانود اٹی سقم مریک تو اوٹی ترمیم کروئی ضرور مریک۔

(اے پی پی)