سپریم کورٹ عمران خان نا دزگیری ءِ کانود آن چَپ گوندا

اسلام آباد : سپریم کورٹ آف پاکستان چیئرمین پی ٹی آئی عمران خان نا القادر ٹرسٹ اٹ نیب انا کنڈآن دزگیر کننگ ءِ غیرکانودی گوندسا عمران خان ءِ دمدستی یلہ کننگ و اسلام آباد ہائیکورٹ آ ہننگ ناپرمان کرے وخت اس کہ ہائیکورٹ ءِ پرمان کرے کہ او اینو جمعہ نا دے کیس انا دوارہ سماعت ءِ کرسا فیصلہ جاری کے۔ ہرادے پڑک آک امنا کننگ نا پابند مریرہ۔ فواد چوہدری نا کنڈآن دائر کروک درخواست آ چیف جسٹس آف پاکستان عمر عطا بندیال ناکماشی ٹی محمدعلی مظہر و جسٹس اطہر من اللہ غا ساڑی سپریم کورٹ نا مسہ باسکی بینچ سماعت کرے و چیئرمین پی ٹی آئی نا نیب انا کنڈآن القادر ٹرسٹ اٹ دزگیری ءِ غیرکانودی گوندا۔ سپریم کورٹ عمران خان ءِ دمدستی یلہ کننگ نا پرمان کرسا اسلام آباد ہائیکورٹ ءِ کیس انا اینو جمعہ نا دے کننگ و فیصلہ جاری کننگ نا پرمان ہم کرے وخت اس کہ عمران خان ءِ ہم تعلقدار عدالت آ ہننگ نا پارت کرے۔ داکان مست عمران خان نا وکیل حامد خان سپریم کورٹ نا مسہ باسکی بینچ انا مون آ موقف تینائی کرے کہ عمران خان نیب کیس اٹ ضمانت کرفنگ کن ہائی کورٹ آ بسوسس‘ عمران خان بائیو میٹرک کرفیکہ کہ رینجر جلہو کرے‘ درگہ و کھڑکی تے پرغسا عمران خان ءِ دزگیر کننگا وخت اس کہ بائیو میٹرک کرفنگ عدالتی عمل نا بشخ اسے۔ چیف جسٹس پارے کہ ریکارڈ نا رد اٹ ہرا مقدمہ پک ئس او شاید پین اس ئس۔ عدالتی پرمان نا وڑ اٹ درخواست ضمانت دائر مسوسس ولے پک متویسس۔ چیف جسٹس عمر عطا بندیال پارے کہ باندات عدلیہ نا احترام ناءِ‘ نیب اسہ دوبہ دار سے سپریم کورٹ نا پارکنگ آن دزگیر کریسس ہراڑا عدالت دزگیری ءِ پدی کرسا نیب انا برخلاف کارروائی کریسس‘ نیب عدالت ءِ باور کرفیسس کہ داکان پد دن ءُ حرکت کپک۔ چیف جسٹس سوج کرے کہ عمران خان ءِ اخس بندغ دزگیر کریر؟ وکیل سلمان صفدر پارے کہ 80 آن سَد بندغ مسرہ۔ چیف جسٹس پارے کہ 100 بندغ نا عدالتی دنگ اٹ بننگ آن خلیس ودی مریک۔ جسٹس اطہر من اللہ پارے کہ عدالت اٹ سرنڈر کروک آتے دزگیر کننگا تو کس اس عدلیہ غا امر پت کیک؟ چیف جسٹس پارے کہ وارنٹ نا کانودی وڑ انا آخا اونا تعمیل نا جاچ ءِ ہلینہ۔ سلمان صفدر ایڈووکیٹ پارے کہ دزگیری نا وخت آ نیب انا پرسجو افسر ساڑی الو‘ عمران خان ءِ ججز گیٹ آن سر کننگا۔ عمران خان نا دزگیری آن پد سما تما کہ یکم مئی آ وارنٹ جاری مسوسس۔ جسٹس اطہر پارے کہ نیب کیہی سال آن گچین مروک نمائندہ غاتتون ہندا وڑ انا حرکت کننگ اٹی ءِ داسہ وخت بسنے کہ نیب انا دا کاریمک ایسر مریر۔ چیف جسٹس عمر عطا بندیال پارے کہ دزگیری آن انت مس بایدے اودے توننگوسس‘ دانا مطلب دا اف کہ غیرکانودی گام گیج تیان خن تے چَپ کننگے‘ ہندن ءُ فیصلہ اس تننگ خوانہ ہرانا اطلاق ہر شاری آ مریک۔ میانوالی نا ضلعی عدالت آ اینو جلہو مسنے‘ معلوم کننگے کہ دیر کرینے؟۔جسٹس محمد علی مظہر پارے کہ گڑا نیب انا نوٹس آتا ورندی تننگاسس؟ عمران خان نا وکیل اَؤ اٹ کاٹم ءِ سرفے کہ نیب انا نوٹس تا ورندی تننگاسس۔۔ جسٹس اطہر من اللہ پارے کہ اصل ویل نیب وارنٹ آخا تعمیل کرفنگ نا وڑوڈول اناءِ۔

(آن لائن)