بلوچستان اٹ غریبی آن حالت بد ءِ، جمیل احمد کرد

کوئٹہ : الخدمت فاؤنڈیشن بلوچستان نا صدر انجینئرجمیل احمدکرد پارینے کہ بلوچستان اٹ غریبی و بے روزگاری حالیت آتے بد کرینے‘ الخدمت فاؤنڈیشن ڈکھیا تا خذمت کننگ کن رنگ ونسل نافرق آن بیدس علاقہ ٹی کاریم کننگ اٹی ءِ‘ چوری تے ولفنگ‘ جنوزان‘ غریب طالب علم‘ حقدار و ضرورت مند آتا خذمت‘ تعلیم و دراخ جوڑی نا پروجیکٹ آتے ٹی گچینی اتنگ و غریبی تے چٹفنگ کن پراجیکٹ آتا سرسہبی کن الخدمت فاؤنڈیشن مچ آصوبہ ٹی جہد کننگ اٹی ءِ‘ ازگار‘ پوریاگر برادری‘ انسانیت نا خذمت کروک آک الخدمت فاؤنڈیشن ءِ عطیہ‘ زکواۃ وصدقہ ایتر تاکہ امانت آتے حقدار آتے ٹی بشخ وپانٹ کننگ ءِ پک کننگ مرے۔ دا خیال آتادرشانی ءِ او ازگار آتا ڈل اتون اوڑدہی و دیوان آن تران کرسا کرے‘ او پارے کہ کوئٹہ تون اوار بلوچستان نا ایلو کل بھلا علاقہ غاتے ٹی ننا پروجیکٹ آک چلینگ انگ ءُ‘ نن ازگار آتا ڈونر تا کمک اٹ بلوچستان اٹ فریشان‘ غریب‘ حقدار بندغ‘ چوری‘ جنوزان‘ غریب طالب علم و دیہاڑی کروک مزور وایلو مسکین وغریب آتا کمک کننگ کن پروجیکٹ آتیا کاریم کننگ اٹی ان۔ الخدمت فاؤنڈیشن تدوک آ سال نوکاپ و پِر انا زہمی تے کروڑ آتاکمک کرے اوفتے ریلیف تننگ و بحالی نا پراجیکٹ آک داسکان برجاءُ‘ روچہ مبارک اٹ ہم کم کٹیا کروک‘ غریب‘ مسکین تے راشن تننگا‘ چوری تے ولفنگ نا پروجیکٹ آک ہم مچ آصوبہ ٹی برجاءُ۔ چوری تے ولفسا تعلیمی کمک کرسا اوفتے راج انا کاریمی بندغ جوڑ کننگ انگ ءِ‘ جنوزان‘ چناتا لمہ غاتتون اوار ایلو حقدار نیاڑی تے روزگار تننگ اوفتا مالی کمک وہنر ہیل تننگ نا بابت راہشونی وکمک نا پروجیکٹ آک چلینگ انگ ءُ‘ دا کل ازگار وخیرات تروک آتا کمک اٹ چلینگ انگ ءُ‘ ننا استخواہی ءِ کہ بلوچستان نا پراجیکٹ آتے ٹی زیات آن زیات دا جاگہ نا ازگار آک کمک کیر تاکہ دا پروجیکت آتا کچ ءِ ودفنگ مرے۔ ازگار‘ پوریاگر برادری‘ اسلامی راجی تنظیمک نن تون کمک کار ءُ دا کل ءِ نن اللہ نا رضا و فریشان الس نا فریشانی تے کم کننگ کن کننگ اٹی ان۔ ازگار آک ڈونر کانفرنس تتون اوار ایلو وارخواہی تیا نن تون پبی کمک کیر‘ ازگار ڈونر‘ رضاکار تا کمک اٹ ننا پروجیکٹ آک چلینگ انگ ءُ‘ انشاء اللہ دافتا کچ ءِ پین ودفنہ۔

(آن لائن)