گورنر بلوچستان نا پنجاب و خیبرپختونخواہ نا ہم منصب آتیا فون

کوئٹہ : گورنر بلوچستان ملک عبدالولی خان کاکڑ پنچ شنبے نادے تینا منصب گورنر پنجاب محمد بلیغ الرحمٰن و گورنر خیبر پشتونخوا حاجی غلام علی تون ٹیل فون آ ہیت کرے‘ ہر مسٹ آ راہشونک ملک انا سیاسی ندارہ‘ صوبہ غاتا نیام اٹ تعلقداری تے سوگو کننگ‘ الس اٹ جم احساس ءِ بش خننگ و کانود نا پاسداری تون اوار تین پہ تینی استخواہی تا امور تیا گپ وگران کننگا‘ دا وخت آ گورنر بلوچستان ملک عبدالولی خان کاکڑ پارے کہ اختلاف رائے ءِ شرف تننگ راج انا زیبائی ءِ‘ راجی ارتقاء و سوگو شونداری نا راز السی سیاست اٹی ءِ و سیاست ننے بردباری و اختلاف رائے نا شرف ءِ ایتک‘ او پارے کہ پرامن برانز کننگ ہر شاری نا بنداوی حق ءِ ولے کل سیاسی کیڈر آتے خلنگ پرغنگ‘ خاخر تننگ و بیدادی آ واقعہ غاتے ٹی بشخ ہلپس‘برانز کروک آک ہم ننا ایلمک ءُ ولے یات تخنگے کہ ننا ورناتا برانز و جوزہ غان تخریب کار آک فائدہ ہرفنگ کیرہ۔ گورنر بلوچستان پارے کہ دا ہیت تو پیدوار ءِ کہ خواری کش تپّہ سٹی آ ہڑتال‘ برانز و قومی شاہراہ تا بند مننگ آن زہمی مریک‘ داڑتون اوار جھیڑہ و کانود آن چَپ کارم کننگ آن زرگزرانی بے آسودگی، بیگانگی و بے چیٹی زیات مننگ کیک۔ گورنر بلوچستان ملک عبدالولی خان کاکڑ پارے کہ ساڑی حالیت آتے ٹی الس نا جان ومال انا رکھ ءِ پک کننگ نابابت کل کانود نافذ کروک آتا کوشست آک ستا کڑزرہ‘ او پارے کہ ملک صوبہ غاتا فائدہ ٹی کل اختلاف آتے تین پہ تینی ہیت وگپ اٹ ایسر کننگے‘ کل شاریک آئین نا بالادستی و جمہوری ریسہ ءِ برجا تخنگ اٹ تینا کڑدار ءِ سر ایتر۔

(خ ن)