سرکاری افسر آک زمواری تکسا الس نا کاریم تے کیر، نذر بلوچ
زمواری تے جوان سر تننگ آن پد ننا ادارہ غاتا کارکڑد اٹ ودکی بننگ کیک، السی ویل آک ہم کم مریرہ
Get real time updates directly on you device, subscribe now.
کوئٹہ : صوبائی محتسب بلوچستان نذر محمد بلوچ ایڈوکیٹ پارینے کہ سرکاری ادارہ غاتے ٹی ساڑی افسر و ایلو کارندہ غاک تیناکسبی فرض آتے ایمانداری و خدمت خلق نا جوزہ اٹ پورو کننگ نا کوشست کیر تو داڑان نئے بیرہ ننا ادارہ غاتا کارکڑد زیات مریک بلکہ الس ءِ مون تروک ویل آک ہم بھلو حد اسسکان کم مریرہ۔ دا خیال آتا درشانی ءِ او تدوک آ دے بولان نا شار مچھ اٹ اسسٹنٹ کمشنر نا دفتر اٹ ضلع کچھی نا ضلعی افسر آتیان تران کرسا کرے۔ داوخت آ بنجائی محتسب نا ریجنل ڈائریکٹر غلام سرور بروہی، ڈائریکٹر محتسب سیکرٹریٹ سعید احمد شاہوانی، رجسٹرار محتسب سیکرٹریٹ سید محمد علی، رجسٹرار بنجائی محتسب بلوچستان امیر محمد رند، پروٹوکول آفیسر آفتاب احمد و جونیپر لائینز کلب نا صدر نورالامین زہری وایلوفک ساڑی ئسر‘ دیوان آن تران کرسا صوبائی محتسب پارے کہ محتسب ادارہ سرکاری محکمہ غاتے ٹی ساڑی افسر و ایلو کارندہ غاتا کنڈآن بندغ اسے تون مروک بیدادی نا ازالہ ءِ کیک بلکہ بھاز آ بھلا نوعیت نا باندات آتے ٹی کانود و آئین نا رد اٹ سخت کارروائی کننگک۔ اوپارے کہ الس تون اوار سرکاری ملازم آتا ہم وکیل اٹ و ای ملازم آتا ویل آتے ایسر کننگ کن ہم کوشست کننگ اٹی اٹ‘ دیوان اٹ بنجائی محکمہ غاتا تعلقدار کمامدار آک بنجائی محتسب بلوچستان نا ریجنل ڈائریکٹر غلام سرور بروہی ءِ تینا تینا ادارہ غاتا کارکڑد نا بارو اٹ جم تیان معلومدار کریر۔
(خ ن)