ملک ءِ پولیو آن پاک کننگ کن سنبرینگوک اُن، شہباز شریف

اسلام آباد: وزیراعظم محمد شہباز شریف پارینے کہ پاکستان ءِ پولیو کون آ مرض آن پاک کننگ کن حکومت سنبرینگوک ءِ، پاکستان نا آخبت ءِ پولیو آن پاک کننگ اسکان جندی چاروکی اٹ تینا کوشست آتے برجاتخک۔ وزیراعظم آفس میڈیا ونگ آن جاری بیان نا رداٹ وزیراعظم محمد شہباز شریف تون روٹری فاؤنڈیشن نا ڈل انٹرنیشنل پولیو پلس کمیٹی نا سروک مائیک میک۔گورن نا کماشی ٹی اوڑدہی کرے۔ اوڑدہی ٹی روٹری نا عہدیدار عزیزمیمن، فیض کڈوائی، عدنان روہیلہ و تعلقدار وزارت آتا بڑزکو کمامدارآک بشخ ہلکر۔ وزیراعظم پارے کہ پاکستان آن پولیو نا چٹفنگ کن روٹری انٹرنیشنل و بل و میلنڈا گیٹس فاؤنڈیشن نا خذمت ستاکڑزک، حکومت انسداد پولیو ورکرآتا سیکورٹی ءِ پک کننگ اٹی ءِ، وزیراعظم 2022نا نوکاپ آن زہمی تیکن روٹری انٹرنیشنل نا کنڈآن ہنکینی ڈٹ آتا جوڑ کننگ نا است بڈی ءِ کرے۔ وزیراعظم تعلقدار کمامدارآتے پولیو نا بروک آ مہم کن جوان ءُ حکمت عملی اس جوڑ کننگ نا پارت کرے۔ اوڑدہی ٹی وزیراعظم ءِ پاننگاکہ روٹری انٹرنیشنل و انسدادِ پولیو کن مہم کن ایلو شریدار آک برجاسال 1 کروڑ 50 لکھ ڈالر جتا کرینو۔ اوڑدہی ٹی کمامدارآک وزیراعظم ءِ ملک اٹی پولیو مہم تا ساڑی آ حالیت آتا بارواٹی معلومدار کریر و پاریر کہ سویلی خیبرپختونخوا ٹی انسداد پولیو کن خصوصی مہم نا بناءِ ہم کننگ انگ ءِ۔ وزیراعظم تعلقدار کمامدار خاص وڑاٹ کانود نافذ کروک آ ادارہ غاتے پارت کرے کہ پولیو ورکرآتا سیکورٹی ءِ ہر حال اٹ فول پروف کننگے۔ وزیراعظم وزارت قومی جان جوڑی نا کمامدارآتے ہم بروک آ پولیو تور مہم کن پورو تیاری نا پارت کرے۔

(اے پی پی)