گورنر بلوچستان نا دورہ وڈ، سردار مینگل نا قبر آ حاضری

خضدار : گورنر بلوچستان ملک عبدالولی خان کاکڑ پارینے کہ الس تون برائے راست رابطہ و مذاکرات کننگ آن مون تروک السی ویل آتا ایسر ءِ پٹنگ اٹ کمک رسینگک‘ مر انگا ضلع غاتا باقاعدہ دورہ کننگ آن بلوچستان نا مر انگا علاقہ غاتا حالیت و الس ءِ مون تروک ویل آتیان آگاہی ہم مننگ کیک۔ او گورنر بلوچستان پن کننگ آ پارٹی نا قائد سردار اختر جان مینگل تون اوار سرکڑدہ و کارندہ غاتا منت ءِ ہرفے۔ دا خیال آتا درشانی ءِ او گورنر نا منصب آ تولنگ آن پد اولیکو وار خضدار نا تحصیل وڈھ انا دورہ نا وخت آ کرے۔ تحصیل وڈھ آ سر مننگ آ گورنر بلوچستان بلوچستان نیشنل پارٹی (بی این پی) نا بن سروک سردار عطاء اللہ خان مینگل نا قبر آ حاضری تس و پھل شاغا وایماندار نا ایصال ثواب کن دعا کرے۔ داوخت آ صوبائی اسمبلی نا باسک میر یونس عزیز زہری، میر احمد نواز بلوچ، بی این پی نا سینئر سرکڑدہ و علاقہ نا متبر‘ کمشنر قلات ڈویژن، ڈپٹی کمشنر و ڈی پی او ہم ساڑی ئس۔ اوکان گڈ خضدار نا تحصیل وڈھ اٹ ہندی میرمتبر و بی این پی نا سرکڑدہ غاتتون ہیت وگپ کرسا گورنر بلوچستان ملک عبدالولی کاکڑ پارے کہ بحیثیت گورنر تینا دورہ غاتا بناءِ وڈھ آن کریٹ‘ دورہ نامسخت مر و پدتموک علاقہ غاتا الس نا ویل آتیان آگاہی دوئی کننگ ءِ و السی ویل ومشکل آتا آخبتی ایسر پٹنگ ءِ۔ خضدار آسر مننگ آ کمشنر قلات ڈویژن داؤد خان خلجی امن نا حالیت و برجا شونداری ڈٹ آتابابت سرجم بریفنگ تس۔ گورنر بلوچستان ملک عبدالولی خان کاکڑ داکان گڈ مینگل ہاؤس آ ہنا‘ ہراڑے پارٹی نا ہندی راہشون‘ قبائلی متبر و سیاسی کارندہ غاتتون اوڑدہی کرے۔ گورنر پارے کہ صوبہ نا گورنر آنبار کنے بھلو زمواری اس سرتروئی ءِ ہراڑکن نما کمک ناگرج ءِ‘ او دعا کرے کہ اللہ کنے الس نا اومیت آتے پورو کننگ اٹ سرسہب و سرخرو کے۔

(آن لائن)