امن ایمنی ءِ پک کننگ کن زمواری تے پورو کینہ، وزیر اعظم

اسلام آباد : وزیراعظم محمدشہباز شریف پارینے کہ حکومت امن ایمنی ءِ پک کننگ کن تین زمواری تے پورو کیک‘ الس عمران نیازی نا منفی سیاست آن تنک مسنے‘ دابندغ سیاست اٹ کرینگ و بیدادی تے پد ریسہ شون تننگ اٹی ءِ‘ جند تے زمان پارک اٹ تینے ڈکانے و کارندہ غاتے مونی کننگ اٹی ءِ‘عدالت آتے ٹی پیش مننگ آن بچنگ کن ہڑدے پوسکن ءُ راگ اس کننگ ءِ‘ دا خیال آتادرشانی ءِ او بنجائی وزیر ریلوے و ہوا بازی خواجہ سعد رفیق تون اوڑدہی ناوخت آ کرے‘ ترجمان وزیراعظم آفس نا رد اٹ وزیراعظم شہباز شریف تون بنجائی وزیر ریلوے و ہوا بازی خواجہ سعد رفیق یک شنبے نادے اوڑدہی کرے‘ اوڑدہی ناوخت آ پاکستان ریلوے و ایوی ایشن نا امور و ملک و پنجاب نا جم سیاسی حالیت آتیا گپ وتران کننگا‘ دا وخت آ وزیراعظم پارے کہ نوازشریف ہر تحریک نا تینٹ کماشی ءِ کرے و کارندہ غاتیان مست جیل آ ہنا۔ عمران نیازی عدالت آتے ٹی پیش مننگ آن بچنگ کن پوسکن ءُ راگ اس کیک۔ اوپارے کہ الس نا جان ومال انا رکھ ءِ پک کننگک و حکومت امن وایمنی ءِ پک کننگ کن تینا زمواری تے پورو کیک۔ وزیراعظم بنجائی وزیر ریلوے و ہوابازی تون ہیت وگپ کرسا پارت کرے کہ ریلوے و پی آئی اے ٹی اصلاحات نا کمک اٹ گچینی اتنگے‘الس ءِ گچین آسراتی رسیفنگ کن کل گام گیج آتے کننگے‘ حوالی نا رد اٹ سعد رفیق تینا وزارت آتا بابت امور و کفایت شعاری نا گام گیج آتیان آگاہ کرے۔ داکان بیدس وزیراعظم شہباز شریف سلاہکار وزیراعظم قومی میرات‘ ربیدہ و سیاسی امور انجینئر امیر مقام ءِ پرمان کرے کہ خیبرپختونخواہ ٹی السیرابطہ مہم ءِ ترند کننگے۔ وزیراعظم محمد شہباز شریف تون سلاہکار وزیراعظم برائے قومی میرات‘دود ربیدہ و سیاسی امور انجنیئر امیر مقام اوڑدہی کرے‘ اوڑدہی ناوخت آ قومی میرات و دود ربیدہ ڈویژن ناامور تیا وگپ وتران تون اوار ملک انا جم سیاسی حالیت و تین پہ تینی استخواہی تا ایلو امورتیا ہم ہیت وگپ کننگا۔انجینئر امیر مقام وزیراعظم ءِ خیبر پختونخواہ نا سیاسی حالیت آتیا سرجم بریفنگ تس۔ وزیراعظم شہباز شریف امیر مقام ءِ پرمان کرے کہ خیبر پختونخواہ ٹی السی رابطہ مہم ءِ ترند کننگے ورابطہ غاتے گچین کننگ کن ڈیجیٹل ٹیکنالوجی ءِ زمواری اٹ کاریم اٹ اتنگے۔ وزیراعظم امیر مقام نا پارٹی ءِ شیفکو کہول اسکان منظم کننگ کن کروک گام گیج آتا ستاءِ ہم کرے۔

/ لاہور(آن لائن)