دفعہ 144، پی ٹی آئی نا لاہور گچین کاری ریلی ولدا ملتوی

لاہور : پاکستان تحریک انصاف نگران پنجاب حکومت ناکنڈآن دفعہ 144 نا نفاذ آن پد یک شنبے نا دے لاہور اٹ مروک گچین کاری ریلی ءِ ولدا ملتوی کرے۔ چیئرمین تحریک انصاف عمران خان ٹوئٹر آ تینا کلہو اٹ پارے کہ ہندن لگنگ ءِ کہ دفعہ 144 غیر کانودی وڑ اٹ بیرہ و بیرہ پی ٹی آئی نا گچین کاری مہم آ خلنگانے وخت اس کہ لاہور اٹ ایلو کل السی سرجز آک برجاءُ۔ عمران خان پارے کہ بیرہ زمان پارک ءِ کنٹینر و پولیس نا کارندہ غاتے ٹی گھیڑ کننگانے‘ پاش وڑ اٹ 8 مارچ انا وڑ پنجاب نا وزیراعلیٰ و پولیس جنگ ءِ ودفنگ خوارہ تاکہ اودے پی ٹی آئی نا سرکڑدہ و کارندہ غاتا برخلاف پین ایف آئی آر درج کننگ وگچین کاری تے پد بٹنگ نابہانہ ناوڑ اٹ کاریم اٹ اتنگ مرے۔ اوپارے کہ گچین کاری نا شیڈول ناپڑو کننگانے تو گچین کاری سرجز آتیا دفعہ 144 امر خلنگ مریک؟ ای پی ٹی آئی نا کل کارندہ غاتے پاننگ اٹی اٹ کہ دا جال اٹ اڑینگپس‘ ہندا سوب آن نن ریلی ءِ اسہ دے اکن ملتوی کرینن۔داکان بیدس پریس کانفرنس آن تران کرسا پی ٹی آئی نا راہشون حماد اظہر پارے کہ ای عمران خان تون ہیت کرینٹ۔ پی ٹی آئی ریلی ءِ ملتوی کرینے۔ ریلی پگہ یا اوکان پد ہم مننگ کیک‘ نن پرامن گچین کاری و اقتدار ءِ پرامن وڑ اٹ گدریفنگ خوانہ۔ کمامدار آک شار انا کسر تے ملر‘ اوپارے کہ نن دوارہ لاش تے پٹنگ خواپنہ‘ تانکہ نن کانودی سلاہ کننگ اٹی ان ہمو وخت اسکان عمران خان ناپرمان کن ہرر‘ اوپارے کہ ننے آ بیداد کننگا ولے نن آئین وکانود نا کسر ءِ الیتون۔ دفعہ 144نا اسہ کانود اسے‘ دانا بارو اٹ 24گھنٹہ مست پاروئی تمک‘ داڑے عمران خان ہندن کہ کڑسی آن بش مریک تو سیکشن 144 خلنگک۔ او پارے کہ ایلو اسہ وار ولدا لاہور اٹ فاشسٹ حکومت کرفیو خلکنے‘ دا نگران حکومت مارشل لا غان ہم گندہ ءِ‘ تینا خلیس ءِ ڈکنگ کن پی ایس ایل نا پن ءِ کاریم اٹ اتنگا‘ دا کل آن بھلا سیاسی جماعت ءِ سیاسی ایکٹیویٹی کننگ آن توننگ اٹی ء‘ مسکوہی بنجائی وزیر پارے کہ حکومت لاش بٹنگ خواہک اودے ٹارگٹ رسینگانے‘ آئین کانود پیدوار ءِ۔ ہائی کورٹ و سپریم کورٹ ناپرمانک پیدوار ءُ‘ ننا بنداوی حق آک اریر‘دا پین ناکمک آسلوک حکومت زیات سلنگ کپک‘ ساڑی حکومت عمران خان آن خلنگ اٹی ءِ‘ ہرا افسر آک بیداد کریر ننے ہمو کل انا سماءِ‘ اوفتا برخلاف 100 درسَد کارروائی کننگک‘ دا بندغ آک منہ تُو آن پد سلپسہ۔

(آن لائن)