کس نیام تمپ تو عمران خان ہچ گہس کٹنگ کپک، حافظ حمد اللہ
شفاف گچین کاری مرے، و اسٹیبلشمنٹ نا کڑدار مف تو وزیرا عظم مننگ عمران خان کن بیرہ تغ اس مریک
کوئٹہ : جمعیت علماء اسلام نا بنجائی راہشون و پی ڈی ایم نا ترجمان حافظ حمداللہ پارینے کہ اگہ ملک اٹ ساف وشفاف گچین کاری مرے و اسٹیبلشمنٹ ناکڑدارمف تو عمران خان پاکستان نا تاریخ اٹ ہچ گہس وزیراعظم جوڑ مننگ کپک‘ ملک اٹ کبینی نازموار عمران خان ءِ، پی ڈی ایم ملکی زرگزران نا گچینی کن پبی کوشست کننگ اٹی ءِ‘ ضلع ہرنائی نا پدتمنگ نا زموار دا جاگہ نا قومی اسمبلی و صوبائی اسمبلی نا باسک آک ءُ ہرافتا بنجا وصوبہ ٹی حکومت اٹ مننگ آن پد ہم ضلع ہرنائی ویل آتا گواچی ءِ۔ دا خیال آتا درشانی ءِ او ہرنائی نا دورہ ناوخت آ پریس کانفرنس آن تران کرسا کرے۔ داوخت آ جمعیت علماء اسلام نا راہشون مفتی عبدالصمد ساعد، حافظ شمس الدین ہم ساڑی ئس‘ حافظ حمداللہ پارے کہ پی ڈی ایم نا حکومت تینا ریاست ءِ بچفنگ کن بھلو قربانی تسنے، عمران ریاست تون اوار ریاست نا زرگزران ءِ بھس کرے و تینا سیاست ءِ بچفے۔ پی ڈی ایم کوشست کننگ اٹی ءِ کہ کبینی چٹے و پاکستان نا زرگزران سوگو مرے۔ او پارے کہ پی ڈی ایم حکومت تینا سیاست ءِ نسخانی و ریاست ءِ بچفینے۔ عمران نا حکومت مسکہ تو پاکستان ڈیفالٹ و دیوالیہ مسکہ‘ سرکاری لنکا غانبار مسکہ و خدا کپ پناکہ ولے پی ڈی ایم نا حکومت نا کوشست آتا سوب آن پاکستان ڈیفالٹ مننگ‘ سری لنکاغانبار مننگ و پننگ آن بچانے۔ او پارے کہ جیل بھرو تحریک نا روح رواں و امریکہ ءِ دھڑکو تروک و تینے مجاہد پاروک عدالت اٹ پیش مرے‘ اگہ دامن سَفاءِ‘ گھڑی دزتنے تو تینے کانود نا دوٹی ایتے‘ اوپارے کہ کانود آعمل کننگ نا بھاشن تروک آ کانود آن نرنگ اٹی ءِ‘ عمران خان زمان پارک بنکر اٹ تینے ڈکنگ آن نیلسن منڈیلا جوڑ مننگ کپک۔ حافظ حمداللہ پارے کہ ضلع ہرنائی نا پدتمنگ نا زموار دا جاگہ نا السی نمائندہ غاک ءُ‘ او پارے کہ داکان وونٹ ہلوک آک بنجا و صوبائی حکومت اٹ مننگ آن پد ضلع ہرنائی نا شونداری آ ہچ چکار کتنو ہراکہ است ہسونی نا سوب ءِ۔
(آن لائن)