تعلیم تون اوار گوازی تا آسراتی آ ہم چکار کرینن، میر قدوس بزنجو

کوئٹہ : وزیراعلیٰ بلوچستان میر عبدالقدوس بزنجو اولیکو بلوچستان گیمز نا بنا مننگ آ گوازی گر تا پن آ تیناکلہو اٹ پارینے کہ صوبائی حکومت بلوچستان نا ورناتے تعلیم ناپوسکن آ آسراتی تا فراوانی تون اوار اوفتا ذہنی و جوانی لائخی تے مون آاتنگ کن ہم پبی گام گیج کننگ اٹی ءِ صوبہ نا کنج کنج اٹ گوازی تا پڑ آباد کننگانے‘ نن خوانہ کہ ننا ورناک منشیات و سٹی آ سرجزآتیان مُر مریر و راج دشمنک اوفتے تینا کاریم اٹ اتنگ کپس‘ وزیراعلیٰ پارے کہ ننا ورناک ننا اصل میرات ءُ ہرافتے صوبہ نا تقدیر ءِ بدل کروئی ءِ و داوڑ ہمو وخت آ مننگ کیک ہراتم نن اوفتے رکھوک و دراخ جوڑ چاگڑد فراوان کین۔ وزیراعلیٰ پارے کہ ای صوبہ ٹی گوازی تا شونداری کن گوازی تا وزیر عبدالخالق ہزارہ‘ سیکرٹری گوازی اسحاق جمالی و ڈائریکٹر جنرل گوازی درا بلوچ نا کوشست آتا ستاءِ کیوہ۔ وزیراعلیٰ پارے کہ داخس بھلو کچ اسے ٹی گوازی تا گو اڈ تننگ آن ملک و مچ آدنیا ٹی بلوچستان نا بابت اسہ مثبت ءُ کلہو اس کاہک کہ بلوچستان نا الس گوازی تتون مہر کیک۔ کوئٹہ ٹی کر کٹ نا نمائشی میچ اڈ تننگ آن ہم صوبہ نا مثبت ءُ تاثر اس مون آ بسنے۔ وزیراعلیٰ ورنا گوازی تیا زور شاغانے کہ او گوازی تا شونداری کن حکومتی گام گیج آتیان پبی وڑ اٹ فائدہ ہرفسا تینالائخی تے مون آ اتیر و قومی وجہانی کہول انا گو تیکن تینے تیار کیر۔ وزیراعلیٰ پارے کہ ای بھاز خوش مسٹ کہ گوازی تے ٹی صوبہ ناکل ضلع غاتیان چار ہزار آن زیات گوازی گر چل گوازی نا گو اٹ بشخ ہلنگ اٹی ءُ و گوازی تا دا رنگ رنگی آ میلہ 20 مارچ اسکان برجا سلک۔

(خ ن)