سعودی عرب نا کند آن اسٹیٹ بینک اٹی 2 ارب ڈالر ڈیپازٹ

اسلام آباد: بنجائی وزیر خزانہ اسحاق ڈار پارینے کہ سعودی عرب اسٹیٹ بینک اٹ ا2 ارب ڈالر جمع کرفینے‘ اسلام آباد اٹ پریس کانفرنس کرسا بنجائی وزیر خزانہ اسحاق ڈار پارے کہ سنگت ملک سعودی عرب اسٹیٹ بینک اٹ 2 ارب ڈالر ڈیپازٹ کرینے‘ اسحاق ڈار پارے کہ ای وزیراعظم پاکستان، آرمی چیف و تینا کنڈآن سعودی حکومت نامنتوار اٹ‘ وزیرخزانہ پارے کہ آخبت اٹ زرگزرانی باندات آک پین گچینی ناکنڈآ کارہ‘ پاکستان نا زرگزران مہالو آن جوان ءِ‘ زوت پین سوگو مریک۔ یات سلے کہ وزارت خزانہ و آئی ایم ایف نا نیام اٹ ایکسٹرنل فنانسنگ نا باندات پک مسنے‘ وزارت خزانہ نا حوالی نا رد اٹ آئی ایم ایف وزارت خزانہ نا راہی کروک 8.2 ارب ڈالر نا فنانسنگ گیپ انا ڈٹ ءِ امنا کرینے‘ حوالی نا رد اٹ پاکستان ءِ آئی ایم ایف، جہانیبینک، ایشین ڈیولپمنٹ بینک، چین، سعودیہ و یو اے ای آن فنانسنگ دوئی کروئی ءِ وخت اس کہ برجا مالی سال اٹ چین آن 3.5 ارب ڈالر نا فنانسنگ نا بست وبند کننگک‘ وزارت خزانہ نا پلان نا رد اٹ سعودی عرب آن 2 ارب ڈالر نا فنانسنگ دوئی کروئی ئس‘ داڑان بیدس یو اے ای آن اسہ ارب ڈالر، ایشیائی شونداری بینک آن 50 کروڑ ڈالرنا فنانسنگ وجہانی بینک آن 50 کروڑ ڈالرنا فنانسنگ دوئی کننگک۔وزیراعظم محمد شہبا ز شریف اسٹیٹ بینک آف پاکستان اٹ اِرا ارب ڈالر ڈیپازٹ کننگ آ سعودی عرب نا سرکڑدہ و ایلم الس نا منت واری ءِ ہرفسا پارینے کہ سعودی عرب نا کنڈآن کمکاری نا فراوانی آن پاکستان نا اقتصادی بحالی و گچینی نا رداٹ ایلم ملک و جہانی برادری نا ودوک آ پت انا عکاسی مننگ ءِ۔ سے شنبے نادے آ تینا اسہ ٹویٹ اسے ٹی وزیراعظم محمد شہباز شریف پارے کہ پاکستانی الس نا کنڈآن او اسٹیٹ بینک آف پاکستان اٹ اِرا ارب ڈالر ڈیپازٹ کننگ آ سعودی عرب نا سرکڑدہ و الس نا منتو ار ءِ۔ وزیراعظم پارے کہ پاکستان کن مالیاتی کمکاری ءِ پک کننگ آ او خاص وڑاٹ تینا ایلم ولی عہد و وزیراعظم شہزادہ محمد بن سلمان نا منت وار ءِ۔ وزیراعظم پارے کہ سعودی عرب نا کنڈآن دا کمکاری آن پاکستان نا زرمبادلہ نا کوڑی تیٹی ودکی مریک۔ وزیراعظم پارے کہ سعودی عرب نا کنڈآن کمکاری نا فراوانی آن پاکستان نا اقتصادی بحالی و گچینی نا رداٹ ایلم ملک و جہانی برادری نا ودوک آ پت انا عکاسی ہم مننگ ءِ۔ وزیراعظم پارے کہ نن پاکستان نا زرگزران اٹ گچینی اتنگ کن غٹ المی گام گیج آتیٹی سنبرینگوک اُن۔ وزیراعظم دا رداٹ بنجائی وزیر خزانہ سینیٹر محمد اسحاق ڈار و آرمی چیف جنرل عاصم منیر نا ہم منت واری ءِ ہرفے و اوفتا کڑد انا ستاءِ کرے۔

(مانیٹرنگ ڈیسک/ اے پی پی)