پیپلزپارٹی نا کنڈ آن 8 اگست آ اسمبلی تے پرغنگ نا سلاہ

اسلام آباد: پاکستان پیپلزپارٹی حکومت ءِ 8 اگست آ اسمبلی تے پرغنگ نا سلاہ تس‘ داہیت ءِ بنجائی وزیر واپاری و پاکستان پیپلزپارٹی نا راہشون نوید قمر پارلیمنٹ ہاؤس اٹ صحافی تتون غیررسمی ہیت وگپ کرسا کرے‘ او پارے کہ نن حکومت ءِ 8 اگست آ کل اسمبلی تے پرغنگ نا سلاہ تسونن‘ اسمبلی تے پرغنگ نافیصلہ ءِ بنجائی حکومت کیک‘ بنجائی وزیر پارے کہ پیپلزپارٹی گچین کاری تیان مست گچین کاری اصلاحات نا خواہندار ءِ‘ گچین کاری اصلاحات اٹ آر ٹی ایس سسٹم کون آباندات آک اہم ءُ‘ او پارے کہ گچین کاری اصلاحات آ سیاسی جماعت آتا امنائی المی ءِ۔ نوید قمر پارے کہ ساڑی سیٹ اپ اٹ پین ودکی کننگ نا مخ تفی ءِ کپنہ و بایدے نگران سیٹ اپ آئینی مُد آن مونی ہنپ۔ او مستی پارے کہ ساڑی اسمبلی تے ٹی ودکی کننگ کن کانود جوڑ کننگ آ اصولی موقف آن پدی مفنہ۔ ایلو کنڈ آ بنجائی وزیر کانود اعظم نذیر تارڑ گچین کاری اصلاحات کمیٹی دیوان آن پد ہیت وگپ کرسا پارے کہ اسمبلی تینا وخت ءِ پورو کیک وخت اس کہ اسمبلی نا وخت ءِ ودفنگپک‘ بنجائی وزیرکانود اعظم نذیر تارڑ مستی پارے کہ اسمبلی پرغنگ نا بابت علم غیب کس اتون مفک او حالیت آتا وڑ اٹ مریک‘ بنجائی وزیر کانود اعظم نذیر تارڑ پارے کہ گچین کاری اصلاحات نا بابت پارلیمانی کمیٹی نا غیر رسمی کاروائی مننگ اٹی ءِ و گچین کاری ایکٹ اٹ مچٹ چنکو چنکو باقاعدگی اریر ہرافتے سہی کننگ نا کوشست کننگ انگ ءِ۔ننا مسخت جوانی ءِ شفاف‘ کنڈ ہلپروک گچین کاری مرے و گچین کاری اصلاحات نا بابت سیاسی جماعت، الیکشن کمیشن نا سلاہ تا جاچ ءِ ہلنگ اٹی ان‘ او پارے کہ بیرسٹر علی ظفر گچین کاری اصلاحات کمیٹی نا باسک ءِ و بیرسٹر علی ظفر آن ذاتی حیثیت اٹ گچین کاری اصلاحات کمیٹی ٹی بشخ ہلنگ نا خواست کیوہ‘ بنجائی وزیر کانود اعظم نذیر تارڑ پارے کہ گچین کاری کانود اٹ ہچ ءُ بدلی اس کپننگ انگ ءِ۔

(آن لائن)