سی پیک انا ڈیہہ انا زرگزران اٹ اہم ءُ کڑد اسے، احسن اقبال

بیجنگ: بنجائی وزیر ڈٹ بندی، شونداری و خصوصی گام گیج پروفیسر احسن اقبال پارینے کہ سی پیک اسہ اہم ءُ ڈٹ اسے ہرا چین و پاکستان نا نیام اٹ تعلقداری نا نشانی ءِ، صدر شی جن پنگ و ہمووخت انا وزیراعظم پاکستان نواز شریف نا مُر ہُننگ ءِ خنسا دا ڈٹ انا بناءِ کننگا دا یات گار ڈٹ ڈیہہ انا زرگزرانی ندارہ ءِ بدل کننگ اٹ اہم ءُ کڑد اس ادا کننگ ءِ وخت اس کہ او رابطہ ءِ مون آ درینے، واپار اٹ ودکی کرینے، و اسیجائی شونہالی کن پوسکن ءُ کسر ہم ملانے۔ داخیال آتا درشانی ءِ او سے شنبے نادے آ بیجنگ اٹ چین پاکستان اقتصادی راہداری (سی پیک) نا 12 می (خصوصی) اسیجائی کمکار کمیٹی جے سی سی نا دیوان آن تران کرسا کرے۔ دیوان نا اسیجائی کماشی ءِ بنجائی وزیر ڈٹ بندی، شونداری و خصوصی گام گیج، پروفسیر احسن اقبال و ائس چیئرمین، نیشنل ڈویلپمنٹ اینڈ ریفارم کمیشن (این ڈی آرسی)، چائنا کانگ لیانگ اسک کریر۔ دیوان اٹ پاکستان و چین نا کنڈآن چندی وزارت و محکمہ غاتا سینئر کمامدار و نمائندہ غاک ہم ساڑی ئسر۔ داوخت آ بنجائی وزیر ڈٹ بندی احسن اقبال پارے کہ سی پیک پاکستان اٹ چین اسٹریٹجک کوآپریٹیو پارٹنر شپ قومی اولیتءِ و دا کسرآک سرسہبی تے سوگو کننگ و آخبت نا گمانی کمکاری ءِ پین ودفنگ نا موقع فراوان کرے۔ اوپارے کہ چندی مزل آتے مہالو آن دوئی کننگانے، کشت وکشار، صنعت، ٹیکنالوجی و کانڑ کنی نا بشخ آتیٹی ودکی و شونداری نا گیشتر گمان ساڑی ءِ۔ بنجائی وزیر احسن اقبال جے سی سی نا خواری آ وزیراعظم شہباز شریف نا کوشست آتا ستاءِ کرے وخت اس کہ پاکستان اٹ کاریم کروک آ چینی کمپنی و شاری تیکن آخبت پالیسی و سازگار چاگڑد فراوان کننگ کن حکومت پاکستان نا عزم انادرشانی ءِ کرے۔ دیوان اٹ توانائی، ٹرانسپورٹ انفراسٹرکچر و گوادر نا کنوینرز تینا مخصوص بشخ آتیٹی مروک آ (JWGs)پورٹ آ جوائنٹ ورکنگ گروپس پیش رفت ءِ تالان کرسا دیوان ءِ معلومدار ہم کرے و آخبت نالائحہ عمل نا بارواٹی آگاہ کرے۔

(اے پی پی)