مولانا پی ڈی ایم نا سروک ءِ، دبئی اوڑدہی تیٹی گوجالنگا تے، حافظ حمد اللہ

اسلام آباد :  پاکستان ڈیموکریٹک موومنٹ نا ترجمان حافظ حمداللہ غاو کرینے کہ دبئی ٹی مروک سلابت اٹ مولانا فضل الرحمن ءِ سلاہ اٹ ہلنگتو او جیو نیوز نا پروگرام اٹ ہیت وگپ کرسا پارے کہ مولانا فضل الرحمن پی ڈی ایم نا سروک ءِ اودے سلابت آن انتئے مُر تخنگا؟ اودے امر گوجالنگ مریک؟۔ حافظ حمداللہ پارے کہ آئینی وڑ اٹ گچین کاریک بایدے تینا وخت آ مریر‘ اسمبلی تا مُد 12 و 13 اگست آ چٹک۔ اسمبلی تے وخت آن مست پرغنگا تو گچین کاریک 90 دے اٹ مریرہ اگہ اسمبلیک وخت آ چٹرہ تو 60 دے اٹ گچین کاری مریک۔ حافظ حمداللہ مستی پارے کہ گچین کاری کرفنگ پی ڈی ایم نا آخا الیکشن کمیشن نا ہم زمواری ءِ‘ نن پن کروک وخت آ گچین کاری تا خواہندار ان۔ اوپارے کہ پی ڈی ایم اٹ اوار جماعت و حکمران سیوت گچین کاری سیوت اس اف‘ ہر پارٹی تینا کارکڑد نا وڑ اٹ گچین کاری تے ٹی کاہک‘ ہر جماعت جتا جتا گچین کاری تے ٹی بشخ ہلیک ولے سیٹ ایڈجسٹمنٹ مننگ کیک۔ داکان مست پی ڈی ایم نا ترجمان مسکوہی سینیٹر حافظ حمداللہ لورالائی ٹی مولوی شمس الدین کبزئی نا ہنکین اٹ میڈیا تون ہیت وگپ کرسا پارے کہ دبئی ٹی پی پی و مسلم لیگ ن نا مذاکرات مہالو آن پک ئس۔ پی ڈی ایم نا سروک مولانا فضل الرحمان ءِ بے علم تخنگ و بائی پاس کننگ آ ننا گڑتیک اریر‘ وخت ننا مستین نا سیاسی جہد آ دیر شاغنگ آنبار ءِ۔ جماعت تنیا تحریک چلیفے و ملک و قوم ءِ عمرانی فتنہ غان قائد جمعیت مولانا فضل الرحمان بچفے نن پانزدہ لانگ مارچ و اسلام آباد اٹ چانڑدے دھرنا تتونہ تو دا فتنہ و مصیبت آن جان خلاسی مشکل ئس۔ او پارے کہ داٹی ہچ شک اف کہ گچین کاریک وخت آ مریرہ۔ مولانا فضل الرحمان ءِ جماعت بروک آ صدارتی اومیتدار پن کرے تو او دا جمہوری عمل اٹ المی بشخ ہلیک۔ او پارے کہ جے یو آئی ملک انا اسہ بھلو مذہبی و سیاسی جماعت اسے و گچین کاری تے ٹی سرسہبی آن پد پارلیمان اٹ بریک۔ بلوچستان و کے پی کے ٹی نن حکومت جوڑ کینہ۔

(آن لائن)