نا اومیتی کفر ءِ، کس ہم پاکستان نا شونداری ءِ توننگ کپک، آرمی چیف

اسلام آباد : آرمی چیف جنرل عاصم منیر پارینے کہ مسلمان تیکن نااومیتی کفر ءِ‘ دنیانااسہ طاقت اس ہم پاکستان ءِ شون ہلنگ آن توننگ کپک‘ اسلام آباد اٹ گرین پاکستان سیمینار آن تران کرسا پاک فوج انا سپہ سالار جنرل عاصم منیر پارے کہ نن کل داڑے پاکستان ءِ اسہ وار ولدا سرسوز کننگ کن اسیجامسونن‘ پاکستان ءِ اللہ تعالیٰ بھاز نعمت تسنے۔ جنرل عاصم منیر پارے کہ نن لائخ ءُ قوم اسے اُن‘ گرج بیرہ داگڑاناءِ کہ نن اسیجائی اٹ دانا شونداری ٹی بشخ ہلین‘ پاکستان نازرگزرانی شونداری کن ادارہ نا وڑ اٹ ہر وڑ انا کمک نا باور کرفنہ‘پورو استخواہی اٹ ہر وڑ انا کمک ناباور کرفنہ‘پاک فوج انا سروک پارے کہ اللہ نا رحمت آن مایوس مفبو‘ اللہ نارحمت آن بیرہ کافر آک مایوس مریرہ‘ مسلمان تیکن اِرا حالیت ءُ ہراتم اوفتیا سختی اس برے تو او صبر کیک ہراتم خوشی رسینگک تو شکر ادا کیک‘ مسلمان تیکن نااومیتی کفر ءِ۔ جنرل عاصم منیر دیوان آن تران کرسا دا ہم پارے کہ پاکستان ءِ شونداری نا مزل آسر مروئی ءِ‘ دنیانا اسہ طاقت اس ہم پاکستان ءِ شون ہلنگ آن توننگ کپک‘ نن تون ہر وڑ انا لائخی ارے‘ ہرا پاکستان ءِ بھاز مونی دننگ کیرہ۔

(مانیٹرنگ ڈیسک)