پیشن ملک اٹ عمران خان نا داسہ ہم پراکسیک اریر، مریم اورنگزیب

اسلام آباد : حوالکاری وشینکاری نا بنجائی وزیر مریم اورنگزیب پارینے کہ پیشن ملک اٹ مسکوہی وزیراعظم عمران خان نا پراکسیک ساڑی ءُ‘ ہرا زرگزران ءِ بھس کرے اینو اونا ترجمان کس اف‘ اونا ترجمان ٹوئٹر ءِ دا بندغ تینٹ پاریکہ کہ 9مئی کنا دزگیری نا ردعمل ءِ‘ سوشل میڈیا غا ادارہ غاتا برخلاف پراگندہ مہم چلیفوک آتا برخلاف کارروائی کانود نا رد اٹ مریک۔ اسلام آباد اٹ پریس کانفرنس کرسا وزیرحوالکاری پارے کہ اینو پی ٹی آئی نا کس ترجمان اف‘ اسہ بندغ اس ہم دا فتنہ پھسادی کن مون آ بننگ کن تیار اف‘ پیشن ملک مسکوہی وزیراعظم نا پراکسیز آک اریر‘ فارن ایجنٹ ٹوئٹ اٹ منہ سوج کرینے‘ فارن ایجنٹ ٹوئٹ اٹ پارے کہ 9مئی نا فائدہ دیر ءِ مس؟ اینو پگہ اونا ترجمان ٹوئٹر ءِ‘ دابندغ دروغ تڑ و مزغ چری ءِ اونا درمان مننگ کپک‘ سازشی ٹولی ملک ءِ لٹا ہنا‘ وار اس پاہک کنے آ راکٹ لانچر اٹ جلہو مریک‘ چیئرمین نا پراکسیک خطرناک کاریم کننگ ءُ‘ پیشن ملک چیئرمین پی ٹی آئی نا پراکسیک اریر‘ دا بندغ اول اٹ پاریکہ کہ کنا دزگیری نا ردعمل تو بروئی ئس‘ نے نا ڈوہ اناسماءِ ہندا سوب آن ہر عدالت اٹ بالٹی کاٹم آ بریسہ۔ مگہ کاٹم ءِ بالٹی اٹ ڈکنگ آن جلہو مفک۔ وزیرحوالکاری پارے کہ فتنہ نا پاننگ آایلوفتیا دوبہ خلوک آک اینو نوازشریف نا جوانی تا شاہدی تننگ اٹی ءُ‘ او پارے کہ ہرا بندغ آک عمران خان نا پاننگ آ نوازشریف ءِ دز پاریرہ اینو ہمو بندغ آک پاننگ اٹی ءُ کہ نوازشریف جوان ءُ بندغ اس ئس‘ عمران خان ملک اٹ بدبیسئی و بے چیٹی تالان کننگ نازموار ءِ‘ نے تون داسکان ہچ متنے‘۔؟ بیدادی تو دا مریک کہ اسہ مسکوہی وزیراعظم اسے اونا مسڑ تون اوار دزگیر کننگا‘ حمزہ شہباز ءِ بے گناہ بندی کننگا‘ شہبازشریف ءِ کپروک گناہ تا سزا تننگا‘ عمران خان رانا ثناء اللہ غا قسم ہرفسا ڈوہ ثابت کننگ نا کوشست کرے‘ نے انت سماءِ کہ دنا ایڑھک ءُ و دنا مسنک ءُ۔ شہباز شریف ءِ نماز کننگ کن کڑسی تننگتو دا مریرہ بیدادی و بے انصافی‘ شکی مفروک بندغ سوج کیک کہ 9مئی نا فائدہ دیر ءِ مس؟ 9مئی نا فائدہ بیرہ پاکستان نا دشمن تے مس‘ زمان پارک اٹ نیاڑی تے اسپر جوڑ کرسا کٹ انا کیرغ آن تینے ڈکانُس۔ دا بندغ تینٹ پاریکہ کہ 9مئی کنا دزگیری نا ردعمل ءِ‘ نی شہید آتا یادگار تا بے شرفی ءِ کریس‘ نے شرف اٹ زمان پارک اٹ دزگیری نا وارنٹ تننگا نی انت سلوک کریس‘ نی 190ملین پاؤنڈ نا داڑیلی کریس‘ نی گھڑی دزاس‘ نی ریاستی مشینری تے مخالف آتا برخلاف کاریم اٹ ایسس‘ ولے مخالف آتیا اسہ دوبہ اس ہم ثابت کننگ کتویس۔ او پارے کہ ای پیدوار پاوہ کہ اگہ پگہ د اوڑ انا سانحہ اس مس تو دانا زموار اسہ بندغ اس مریک ہرانا پن عمران نیازی ءِ۔ اوپارے کہ عمران خان نا بھس کروک ملک داسہ شونداری نا کنڈآ گام کننگ ءِ، وزیراعظم شہباز شریف ملکی زرگزران نا بحالی کن جوان ءُ فیصلہ کرینو‘ ساڑی حکومت کل آن جوان ءُ بجٹ اس پیش کرے۔ وزیراعظم پیدوار پارینے کہ اسمبلی نا وخت پورو مننگ تون گچین کاری تا پڑو کننگک۔ مریم اورنگزیب پارے کہ پاکستان نا سیاست اٹ عمران خان ہمو اسٹ انگا بندغ ءِ ہرا کل ڈوہ تے کرینے۔

(آن لائن)