جعلی دوائی تے توننگ کن آرمی ایکٹ لاگو کروئی تمک، وزیر اعظم

اسلام آباد :  وزیراعظم محمد شہباز شریف پارینے کہ کشت وکشار پاکستان نا زرگزران اٹ مخ انا ملی مریک‘ پاکستان نا کشت وکشار ءِ دنیا ٹی پیدوار ءُ ہنداس ترفنہ، 60 نا دہائی آن پد اینو پاکستان اٹ ارٹمیکو بھلا کشاری انقلاب مونی بننگ اٹی ءِ‘ گرین پاکستان انیشی ایٹیو ننا قومی زمواری ءِ اگہ پاکستان اٹ جعلی دوائی تے سول کورٹ آتا کمک اٹ چٹفنگ مفک تو دانا چٹفنگ کن آرمی ا یکٹ لاگو اتنگے تاکہ ملک اٹ ہرا کشارگر آک خواری کننگ ءُ او زیان مفس‘ تانکہ ملک اٹ سیاسی سوگوی بفک اسہ ملک اس ہم داڑے زرکاری کننگ کن تیار مفک‘ ہیت آتے ٹی آخا داسہ عمل اٹ پاکستان ءِ عظیم ءُ ملک اس جوڑ کننگ ناوخت بسنے‘ کشارگر آتے کشت وکشار نا شونداری کن وسیلہ درکارمریک ہرافتے کل حکومت اوفتے فراوان کیک‘ برجا سال خولم نا ریکارڈ پیداوار مس انشاء اللہ کرپاس نا فصل اٹ جوان مریک‘ جعلی دوائی تا چٹفنگ کن ننے گام گیج کروئی مریک ننے اواری اٹ بھاز بھلو وژن اسے عملی دروشم تروئی مریک‘پوسکن آ کشاری مشینری تے کاریم اٹ اتنگ آن غیرآباد ڈغارک آباد مریرہ‘ کشت وکشار اٹ شونداری مریک‘ داسہ ننے مستین آنبار ہوغنگ پٹنگ ءِ السا پاکستان ءِ اونا ہند ءِ تروئی مریک۔ گرین پاکستان انیشی ایٹیو نا رد اٹ غذائی تحفظ سیمینار آن تران کرسا شہباز شریف پارے کہ مچ آ پاکستان آن خیسن کشوک آ ننا ایلم داڑے ساڑی ءُ‘ کشت وکشار ننا ملک انا مخ انا ملی ءِ‘ داڑکن نم دے ونن خواری کیرے و پاکستان نا کروڑ آ بندغ آتے کن وخور نا گڑا فراوان کیرے‘ نما خواری ءِ اینو و آخبت اٹ ہم نمے پاکستان نا عظیم جوڑ کروک آتا وڑ یات تخک‘ کنے سماءِ کہ نم ہراڑے داخس خواری کیرے ہموڑے وسیلہ غاتا کمتی ءِ و ہرا حالیت آتے گچین مروئی ءِ او کشت وکشار کن المی ءُ ہموفتے فراوان کننگے و دا حکومت نازمواری ءِ کہ او نم کن کل وسیلہ غاتے فراوان کے تاکہ نم ملک اٹ کشت وکشار ناشونداری کن ہرا کوشست آتے کننگ اٹی اُرے اوٹی نم سہی معنہ اٹ خواری کرسا شون ہلبو و دا بابت سپہ سالار ہرا ہیت آتے کرینے او دا وزیراعظم نا وژن ءِ۔ وزیراعظم پارے کہ 75 سال اٹ دا وڑ انا کیہی وژن آک بسر و ہنا کاغد آتے ٹی فزیبلٹی رپورٹ آک جوڑم سر ولے ہرا اصل گڑاءِ او بیرہ خواری و خواری ءِ‘ داکان بیدس پین ہچ کاریم اف۔ 60 انا دہائی ٹی کشت وکشار ہرا وڑشون ہلکوسس ہمو پاکستان ءِ ہمسائے ملک آتتون اوار ایلو ملک آتیان ہم مون آدریسس و جوان ءُ بج جوڑ کننگا‘ ڈیم جوڑ کننگا‘ ڈور جوڑ کننگا ہراڑان ملک اٹ کشاری انقلاب بس۔

(آن لائن)