نیب ترمیم آتے پارلیمنٹ اٹ بل انا وڑ پیش کننگک، حکومت

اسلام آباد : بنجائی وزیرکانود اعظم نذیر تارڑ پارینے کہ بنجائی کابینہ نیب آرڈیننس اٹ ترمیم کرینے‘ پارلیمنٹ نا دیوان مس تو آرڈیننس ءِ بل انا دروشم اٹ پیش کننگک‘ چیئرمین نیب جاست پاست ءِ تینا خد آن بند کننگک پک‘ احتساب عدالت داسہ فیصلہ کیک کہ مقدمہ بند مرے یا پین عدالت اسے آ کاہے‘ وزیراعظم شہبازشریف، مریم نواز تون اوار کل مقدمہ غاک متکن آ کانود نا رد اٹ چٹانو۔ چیئرمین نیب ساڑی متو تو ڈپٹی چیئرمین ءِ کل واکداری تے تننگانے‘ جسٹس فائز عیسیٰ نا برخلاف قابل اصلاح اولسر جاچ ءِ پدی ہلنگ اٹ کانودی ٹک آک اڑاند ءُ‘ بروک آ منہ دے اٹ پدی ہلنگرہ، جنرل(ر) فیض حمید نا کورٹ مارشل نا بابت کانود ءِ خواننگ آن مست ہچ ءُ بیان اس تننگ خواپرہ۔۔ توشہ خانہ غا کل حکومت آتا ریکارڈ ءِ پبلک کننگک۔ شاید مچٹ وخت لگے انتئے کہ ریکارڈآک کمپیوٹرائزڈ افس‘ اینو عدالت اٹ پانزدہ شرفدار جج تولوک ءُ‘ ادارہ غان سوج ءِ کہ تینا صف آتا جاچ ءِ ہلے کہ اسہ ارا بندغ آ انتئے تنقید مننگ ءِ۔ دا خیال آتا درشانی ءِ او جمعہ نا دے پریس کانفرنس آن تران کرسا کرے‘ بنجائی وزیر کانودپارے کہ بنجائی کابینہ نیب آرڈیننس اٹ ترمیم کرینے‘ سرکولیشن نا کمک اٹ دا وڑ کننگ تنے۔ پرپوزل بس کہ دا کابینہ ٹی پیش کننگے ہرادے تدوک آ دے کابینہ ٹی اتنگا و پیش کننگا۔ اعظم نذیر تارڑ پارے کہ ہرا مقدمہ غاک نیب انا کاریمی دنگ اٹ بتوسہ تو اوفتے تعلقداری ادارہ غاتیا ہنوئی ئس‘ کوشست کننگاسس کہ نیب ءِ میگا کرپشن کیس تیکن تخنگاسس‘ داکان مست نیب اٹ مقدمہ غاک تو جوڑ مسرہ ولے فیصلہ غاک تا متوسہ۔ نیب آ پولیٹیکل انجینئرنگ نا دوبہ لگا‘ اعظم نذیر تارڑ پارے کہ منہ اڑاند ئسر کہ منہ مقدمہ ءِ پد بٹنگاسس۔ ہمو مقدمہ غاتا کچ 200 آن زیات ئس‘ ہموفتے بیلنس کننگ کن دا پوسکن آ ترمیم ءِ کننگانے۔ ٹک 4 انا تشریح ٹی نیب انا افسر آتے ویل مون تروک ئس۔کیس تے عدالت ءِ سر تروئی نہ تو کیسک تعلقدار ادارہ غاتیا ہنارہ۔ بنجائی وزیر کانود پارے کہ اینو مقدمہ غاک سلوک ءُ او متکن آ کانود نا رد اٹ ریگولیٹ مننگ اٹی ءُ۔ نیب آ سیاسی انجینئرنگ نا دوبہ مخلوق تون اوار عدالتی فیصلہ غاتے ٹی ہم مون آ بس‘ اولیکو دے آن پاننگ اٹی ان کہ تینا کیس تے چٹفتنن‘ کیس تے عدالت آک جاچ ہلنگ آن بند کیرہ‘ مقدمہ غاتے تعلقدار پرسجوئی ادارہ غاتیا گدریفنگ کن ترمیم کننگانے‘ اعظم نذیر تارڑ پارے کہ نیب کانود نا سیکشن 4 و 5 اٹ ترمیم کننگانے۔ پنجا کروڑ آن کم والا‘ واکداری تے ناروا کاریم اٹ اتوک آ انکوائریک داسہ تعلقدار فورم تیا کارہ۔

(آن لائن)