وزیراعظم شہباز شریف خولم نا من انا نہاد ءِ 3900پک کرے

اسلام آباد : وزیراعظم شہباز شریف زمیندار تے ر یلیف تننگ کن اہم ءُ گام اس ہرفینے‘ زمیندار تیکن خولم نا من انانہاد ءِ پک کننگا وخت اس کہ نیشنل یونیورسٹی آف پاکستان نابابت ہم اہم ءُ فیصلہ کننگا۔ وزیراعظم شہباز شریف کبینی ءِ مون آتخسا زمیندار تیکن اہم ءُ فیصلہ اس کرینے‘ بنجائی کابینہ خولم نا من انا کمکی نہاد ءِ 3900 روپئی پک کرے‘ کابینہ نا اقتصادی رابط کمیٹی نا سلاہ تے بنجائی کابینہ پک کرے‘ داکان مست خولم نا من انا کمکی نہاد 2200 روپئی پک ئس‘ زمیندار تے فائدہ رسیفنگ و کشاری گڑاتا نہاد آتے ٹی ودکی نا سوب آن کمکی نہاد اٹ ودکی کننگا۔ ایلو کنڈآ نیشنل یونیورسٹی آف پاکستان جوڑ کننگ نا بل ءِ ہم بنجائی کابینہ منظور کرے‘ بل کانود جوڑ کننگ کن داسہ پارلیمنٹ اٹ پیش کننگک۔ داکان بیدس وزیراعظم محمد شہباز شریف تون لیسکو نا چیئرمین حافظ نعمان اوڑدہی کرے۔ جمعہ نادے آ وزیراعظم آفس نا میڈیا ونگ آن جاری بیان نا رداٹ وزیراعظم محمد شہباز شریف روچہ ٹی روچہ تخوک آتیکن سہور و باملنگ نا وخت آتیٹی بجلی نا بے سلنگ آن فراوانیءِ پک کننگ کن گام گیج کننگ نا خصوصی پارت کرے۔ داکان بیدس وزیراعظم محمد شہباز شریف تون قومی اسمبلی نا باسک سید عمران احمد شاہ اوڑدہی کرے۔ جمعہ نادے آ وزیراعظم آفس نا میڈیا ونگ آن جاری بیان نا رداٹ اوڑدہی ٹی ملکی جم سیاسی حالیت و قومی اسمبلی نا تعلقدار حلقہ نا امور تیا گپ وتران کننگا۔

(آن لائن / اے پی پی)