حکومت گوادر شونداری پیکیج آ عمل کننگ اٹی ءِ، میر قدوس بزنجو
ضلع گوادر اٹی تعلیمی نظام، جانجوڑی نا بنداوی پنجر، شاہراہ تا گنڈنگ، ماہی گیری، دیر و بجلی نا نظام ءِ گچین کننگ آ کاریم کننگ انگ ءِ
گوادر : وزیراعلیٰ بلوچستان میر عبدالقدوس بزنجو پارینے کہ ساڑی حکومت ضلع گوادر اٹ تعلیمی نظام، جانجوڑی نابنداوی پنجر‘ شاہراہ تا گنڈنگ‘ ماہی گیر‘ دیر وبجلی نا نظام ءِ گچین کننگ کن شونداری پیکیج نا رد اٹ عملدرآمد کننگ اٹی ءِ۔ دا خیال آتا درشانی ءِ او گوادر اٹ جتا جتا علاقہ غاتیان بروک بندغ آتتون اوڑدہی ناوخت آ ہیت وگپ کرسا کرے‘ اوپارے کہ ضلع گوادر اٹ حکومت مخلوق نا جانجوڑی نابشخ اٹ گچینی اتنگ و مخلوق ءِ جانجوڑی نا آسراتی تا فراوانی کن چندی ڈٹ آتیا عملدرآمد کننگ اٹی ءِ وخت اس کہ جی ڈی اے ہسپتال ءِ باقاعدہ انڈس ہسپتال ءِ تننگانے ہرا جانجوڑی نا بشخ اٹ پوسکن ءُ باب اسے نا ودکی ءِ۔ انڈس ہسپتال نا ملک اٹ راجی خذمت وجانجوڑی نا بشخ اٹ جوان و بڑزکو پن و ہند اسے‘ داسہ انڈس ہسپتال کراچی نا کل بڑزکو و آب و پوسکن آ درمان نا آسراتیک جی ڈی ہسپتال گوادر اٹ مفت رسینگرہ‘ درمان نا دا ادارہ بلوچستان اٹ تینا وڑ انا اولیکو و اسٹ انگا ہسپتال ءِ ہراڑے کراچی نا جوان انگا ڈاکٹر و پیرامیڈیکل اسٹاف پوسکن آ طبی آسراتی تتون اوار دے ونن الس ناخذمت کن ساڑی ءُ وخت اس کہ ضلعی ہیڈکوارٹر ہسپتال میر عبدالغفور کلمتی گورنمنٹ ٹیچنگ ہسپتال ناپوسکن آ ماڑی آ ہم ترندی اٹ کاریم برجاءِ۔ اومانی گرنٹ ہسپتال پسنی نا ماڑی نا پورو مننگ تون ہموڑے ڈاکٹر و پیرامیڈیکل اسٹاف ہم تعینات مسنے و باقاعدہ مخلوق ءِ جانجوڑی نا آسراتی تا فراوانی کن او پی ڈی نابنا مسنے ہرا پسنی نا مخلوق نا اسہ متکن ءُ خواست اس ئس‘ اوپارے کہ شونداری پیکیج نا رد اٹ طالب علم آتیکن کلاس روم جوڑ کننگ و جوڑ جاڑ کن 700 ملین روپئی، پشکان اٹ بوائز انٹرمیڈیا کالج ناتفنگ کن 10 ملین، آسراتی تیان شپ ہال و لائبریری تا تفنگ کن 140 ملین روپئی،گوادر اٹ جانجوڑی نا آسراتی تا نظام اٹ بنداوی جانجوڑی نا یونٹ و جانجوڑی نا ہندجاٹ ءِ گچین کننگ کن 365 ملین، کننگ کن سَفاءُ دیر و دیر انا لولہ‘ واٹر سپلائی اسکیم و دیر انا ٹینکی تیکن 380 ملین روپئی‘ گوازی نا پوسکن ءُ پڑ جوڑ کننگ و اوفتا خیالداری کن 75 ملین روپئی جتا کننگانے۔ داکان بیدس فشریز سیٹ اپ ءِ اپ گریڈ کننگ کن صوبائی حکومت اورماڑہ و جیونی ٹی اِرا فش ہاربر ہم تیار کننگ اٹی ءِ‘ شاہراہ تا بنداوی پنجر ءِ گچین کننگ نا رد اٹ مکران کوسٹل ہائی وے آن گوادر نا چندی خلق آتسکان گنڈوک شاہراہ تے جوڑ کننگ کن 900 ملین روپئی، ایم 8 آن خلق آتسکان شاہراہ تے گنڈنگ کن 700 ملین،کوسٹل ہائی وے و کنڈا سول نا نیام اٹ شاہراہ کن 155 ملین، ڈگرو ناگور و آدم بازار نا نیام انا سڑک کن 75 ملین روپئی جتا کننگانے۔ صوبائی اسمبلی نا باسک میر حمل کلمتی پارے کہ حکومت بیرہ گوادر شار اکن 250 ملین روپئی ناکاریم کننگ اٹی ءِ‘ حکومت اقلیت آتیا ہم خڑچ کننگ اٹی ءِ و ہندا رد اٹ ہندو برادری نا خواست ءِ پورو کننگ کن باؤنڈری وال نا تفنگ کن 13 ملین روپئی جتا کننگانے۔ وخت اس کہ وزیراعلیٰ بلوچستان میر عبدالقدوس بزنجو ءِ ڈپٹی کمشنر گوادر عزت نذیر بلوچ ضلع گوادر اٹ برجا شونداری ڈٹ آتا بابت سرجم بریفنگ تس۔ داوخت آ صوبائی وزیر پبلک ہیلتھ انجینئرنگ عبدالرشید دشتی و صوبائی وزیرداخلہ میر ضیاء لانگو ہم ساڑی ئس۔
(خ ن)