عمران خان گمانی دزگیری نا خلیس آن پوسکن ءُ کسر اس سجفے

لاہور : پاکستان تحریک انصاف نا چیئرمین عمران خان تینا گمانی دزگیری نا خلیس آن پوسکن ءُ کسر اس سجفینے‘ حوالی نا رد اٹ پوسکن آ کسرآ تدوک آ دے اڈ ہلوک دیوان اٹ سجفنگا‘ ہرانا باقاعدہ منظوری ہم تننگانے‘ حوالی نا رد اٹ پی ٹی آئی نا سروک تینا ہنکین زمان پارک نا پیشن آ پین کیمپ جوڑ کننگ نا فیصلہ کرینے و اُرانا مون آ اِرا خورک آ پلاٹ ءِ ہندا مسخت کن کاریم اٹ اتنگک‘ حوالی نا رد اٹ عمران خان زمان پارک انا رکھ اکن ہر وخت پی ٹی آئی نا 5000کارندہ نا ساڑی گڑی ءِ پک کننگ نا پرمان ہم جاری کرینے و دامسخت کن او سویلی پنجاب و خیبر پختونخوا نا پارٹی کارندہ غاتے لاہور آ بٹنگانے۔ وخت اس کہ پاکستان تحریک انصاف نا چیئرمین ومسکوہی وزیراعظم عمران خان پارینے کہ حکمرانک ملک ءِ بھس کرینو‘ قوم تیاری کے‘ حقی آجوئی نا جہد اکن کل ءِ اوار مروئی مریک‘ نن داسہ پدی مفنہ‘ شہید کارندہ علی بلال نا کیس ءِ پورو وڑ اٹ مون آ دینہ‘ نگران وزیراعلیٰ، آئی جی، سی سی پی او نا برخلاف کیس کینہ‘ تینا ویڈیو لنک تران اٹ عمران خان پارے کہ دا وخت آ ملک اٹ بد انگا مارشل نا دور تیان ہم سختی کننگ انگ ءِ‘ کفر انا نظام چلینگ کیک ولے ظلم انا چلینگ کپک‘ عدالت کنا تران آ رکھ ءِ اینک کننگ نا پرمان کرے ولے داکان پد ہم نشان تننگتو۔ داسہ ظل شاہ نا باوہ غا زور شاغنگ انگ ءِ کہ او کیس آن پدی مرے۔ ایلو کنڈ آ بلوچستان ہائی کورٹ چیئرمین پی ٹی آئی عمران خان نا وارنٹ دزگیری ءِ معطل کرے، جمعہ نادے آ اقبال شاہ ایڈووکیٹ نا درخواست آ بلوچستان ہائی کورٹ نا جسٹس ظہیر الدین کاکڑ سماعت کرسا چیئرمین تحریک انصاف نا ناقابل ضمانت وارنٹ دزگیری ءِ اِراہفتہ کن معطل کرے۔ بلوچستان ہائی کورٹ اٹی انصاف لائرز فورم نا راہشون اقبال شاہ ایڈووکیٹ عمران خان نا وارنٹ دزگیری نا برخلاف درخواست جمع کرفے ہراٹی موقف اختیار کننگاسس کہ بجلی روڈ تھانہ ٹی مقدمہ درج مننگ کپک انتئے کہ ہرا دوبہ غا مقدمہ درج مس او بجلی روڈ تھانہ نا دنگ ہی اف، درخواست گزار عمران خان نا برخلاف درج ایف آئی آر ءِ چٹفنگ نا خواست کرینے بلوچستان ہائی کورٹ نا جسٹس ظہیر الدین کاکڑ درخواست آ سماعت کرے و عمران خان چیئرمین تحریک انصاف نا ناقابل ضمانت وارنٹ دزگیری ءِ ِاِراہفتہ کن معطل کرے، داوخت آ پی ٹی آئی نا صوبائی صدر قاسم خان سوری و چیئرمین تحریک انصاف نا کانودی ٹیم بلوچستان ہائی کورٹ اٹی ساڑی ئسر۔

(آن لائن/اے پی پی)