چینی کمامدار آتتون مون پہ مون اوڑدہی وسمی ئسکہ، امریکی سیکرٹری خزانہ

بیجنگ : امریکی سیکرٹری خزانہ جینیٹ ییلن پارینے کہ منہ وخت اٹ سینئر چینی کمامدار آتتون 10 گھنٹہ نا مون پہ مون اوڑدہی وسمی ئسکہ‘ ہراڑان سپر پاورآتا نیام اٹ گیشتری چک وتاڑ تعلقداری تے سوگو کننگ اٹ کمک رسینگک۔ درملکی خبر رساں ادارہ نا رپورٹ نا رد اٹ چین آ راہی مننگ آن مست امریکی سیکرٹری خزانہ جینیٹ ییلن پارے کہ امریکہ وچین کیہی باندات آتے ٹی تین پہ تین آن مُر ءُ ولے اونا دورہ غان تعلقداری تے سوگو کننگ اٹ پیش گامی کننگانے۔ سیکرٹری خزانہ جینیٹ ییلن بیجنگ اٹ امریکی سفارت خانہ ٹی اسہ پریس کانفرنس اسے ٹی بے انصافی آساڑی اقتصادی وڑوڈول و امریکی کمپنی تا برخلاف داسہ ناکارروائی تا بارو اٹ امریکہ ناگڑتی تا حوالہ ءِ ترسا پارے کہ امریکہ وچین نا نیام اٹ اہم ءُ اختلاف ءُ۔ سیکرٹری خزانہ پارے لہ ولے صدر جو بائیڈن و ای امریکہ وچین نا نیام اٹ تعلقداری تے واکداری نا جھیڑہ نا دنگ اٹ ہپنہ‘ نن پانہ کہ ہڑتوم آ ملک آتا شونداری کن بھلو دنیا اسے۔‘ تائیوان تون اوار قومی سلامتی نا باندات آتیا امریکہ وچین ناتعلقداریک خراب ءُ ہراڑے پوسکن آ ٹیکنالوجی تیا امریکی برآمد آتیا رکھ و چین ریاستی صنعتی پالیسی تا سوب آن امریکہ دنیا نااِرا بھلا زرگزران نا نیام اٹ تعلقداری تے گچین کننگ نا کوشست کننگ اٹی ءِ۔ سیکرٹری آف اسٹیٹ انٹونی بلنکن تدوک آ تُو چین نا دورہ ءِ کریسس وخت اس کہ موسمیاتی ایلچی جان کیری نا برجا تُو اٹ دورہ نا گمان ارے۔ یات سلے کہ امریکی سفارتی زور شاغنگ آ بھارت اٹ گروپ آف 20 نا سروکی دیوان اٹ جو بائیڈن و صدر شی جن پنگ نا نیام اٹ نومبر اٹ سان فرانسسکو ٹی ایشیا پیسیفک اقتصادی کمک نا مچی آن مست اوڑدہی نا گمان ارے۔