عمران خان ایلوفتا کمک اٹ آرمی چیف ءِ دھڑکو ترفیکہ، وزیر اعظم

لاہور :  وزیراعظم شہباز شریف تعلقدارہ ادارہ غاتے فوج و اونا سروک نا برخلاف میڈیا مہم چلیفوک آتا برخلاف ملک اٹ وملک آن پیشن کانودی کارروائی کننگ ناپرمان کرے‘ اسہ ٹویٹ اسے ٹی شہبازشریف پارینے کہ چیئرمین پی ٹی آئی چیف آف آرمی اسٹاف جنرل عاصم منیر نا برخلاف پراگندہ و بدنیتی آ تالان مہم اٹ اختہ ءِ۔ آرمی چیف ءِ خونی جلہو نا دھڑکو تننگ کن پیشن ناتے کاریم اٹ اتنگ نا اونا چال بے پردہ مسنے‘ اوپارے کہ ریاستی علامت آتیا اونا ڈٹ بندی آ ساڑی جلہو آک بے سہب مننگ آن پد او پیدوار وڑ اٹ اقتدار اٹ پدی بننگ کن بھاز بے آرام ءِ‘ اودے سما اف کہ اونا دھڑکو‘ بیدادی و بدبیسئی نا سیاست ناوخت چٹانے‘ وزیراعظم پارے کہ دا وڑانا مذمت نا قابل حرکت آتا کمک اٹ او بیرہ تینے بے پردہ کننگ اٹی ءِ‘ ہرانا بنداوی مسخت تینا ذاتی فائدہ غاتے ایلو کل گڑاتیان بڑزا تخنگ ءِ۔ وزیراعظم پارے کہ پاکستان نا الس و سیاسی جماعت آک تینا آرمی چیف و سلہہ بند فوج انا پد اٹ تلار آنبار سلوک ءُ و اوفتا وقار، عزت و سالمیت ءِ نسخان رسیفوک آتا کل کوشست و سازش آتے بے سہب کننگک۔ داکان مست وزیراعظم نا دفترآن جاری کروک بیان نا رد اٹ وزیراعظم پارے کہ فوج و اونا سروک نا برخلاف میڈیا مہم چلیفنگ آجو سلاہ درشانی نا دنگ اٹ بفک‘ دا بیرہ سازش اسے ہرادے پوروقوت اٹ توننگ کانودی فرض ءِ۔ وزیراعظم شہباز شریف آرمی چیف جنرل سید عاصم منیر آ خونی جلہو نا سوشل میڈیا مہم نا مذمت ءِ کرے و پارے کہ 9 مئی نا یوم سیاہ کن ہم ہندا وڑ انا ذہن جوڑ کننگاسس۔ وزیراعظم پارے کہ 9 مئی نا ڈٹ بندی کروک‘ کمکار و ہینڈلر آتے سخت کلہو ءِ کہ پاکستان و اونا ادارہ غاتا برخلاف ہر سازش ءِ بے سہب کننگک۔ اومستی پارے کہ سازشی ذہن و بندغ آک ملک اٹ سیاسی و زرگزرانی سوگوی نابرخلاف ولدا کاریم کننگ ءُ۔ آرمی چیف و فوج انا برخلاف پراگندہ و شرانگیز میڈیا مہم شیطانی ذہن انا ڈٹ بندی نا بھرم ءِ، وزیراعظم پارے کہ شہیدآتا برخلاف پراگندہ سوشل میڈیا مہم چلیفوک آتا پوسکن آ میڈیا مہم اسٹ ڈٹ انا کڑی سے‘ قوم دا سازش ءِ ہم ہمووڑ بے سہب کیک ہراوڑ 9 مئی آ ملک اٹ خانہ جنگی نا سازش ءِ بے سہب کریسس‘ او دا عزم انا درشانی ءِ کرے کہ ملک انا برخلاف سازش کروک آتے ہبکہ ئی اٹ ملک اٹ پوسکن ءُ تنکی ودی کننگ کن الیپنہ‘ قوم تینا فوج و اونا سروک تون سلوک ءِ۔

(آن لائن)