پی ڈی ایم تحریک اس ئس، داسہ گرج تے سلتنے، مولانا فضل الرحمٰن

پشاور : پی ڈی ایم نا سروک مولانا فضل الرحمن پارینے کہ لس گچین کاریک وخت آمریرہ‘ پی ڈی ایم اسہ تحریک اس ئس ہرانا داسہ گرج سلتنے‘ مسلم لیگ ن دبئی میٹنگ نا بابت پی ڈی ایم اٹ اوار جماعت آتتون بایدے سلاہ کروسس‘ پیپلزپارٹی پی ڈی ایم اٹ اف ہندا سوب آن دبئی مذاکرات نا بارو اٹ ارفنگ کپنہ ایان تے‘ سینئر صحافی تتون ہیت وگپ کرسا مولانا فضل الرحمن پارے کہ دا سوج پی ڈی ایم اٹ ساڑی ءِ کہ مسلم لیگ ن دا وخت اسکان سیوت اٹ اوار جماعت آتتون دبئی میٹنگ نا بابت سلاہ انتئے کتو۔ اوپارے کہ دبئی مذاکرات اناگت آخا بلکہ ڈٹ بندی اٹ مس‘ ہندا سوب آن بایدے کل ءِ سلاہ اٹ اتنگوسس۔ سینیئر سیاستدان پارے کہ پیپلزپارٹی پی ڈی ایم اٹ اف ہندا سوب آن اوڑان دبئی مذاکرات نا بارو اٹ ارفنگ کپنہ۔ پی ڈی ایم نا آخبت نابارو اٹ او پارے کہ پی ڈی ایم اسہ تحریک اس ئس ہرانا داسہ گرج سلتنے‘ بروک آ گچین کاری تابابت او پارے کہ لس گچین کاریک تینا وخت آ مریرہ‘ او پارے کہ اسہ تُو اٹ بنجا‘ سندھ وبلوچستان اٹ نگران حکومت آک جوڑ مریرہ‘ اقتصادی حالیت آتا بابت اوپارے کہ زرگزرانی گچینی بننگ بنا کرینے‘ سنگت ملک آک کمک کرسا اولیکو گام ءِ ہرفنگ اٹی ءُ‘ ارٹمیکو گام زرکاری نا مریک۔ پی ٹی آئی نا چیئرمین آتنقید کرسا او پارے کہ چیئرمین پی ٹی آئی امریکہ ءِ کرینگ ہم ایتک و اوڑتون یاری ہم گنڈنگ خواہک‘ عجب ءُ ہیت اسے کہ ہرا جہانی برادری ہرا قرآن پاک نا توہین ءِ کیک ہمو چیئرمین پی ٹی آئی نا مخ تفی ءِ ہم کیک او مستی پارے کہ امریکی پٹھو جعلی کاغد ہرفسا مظلوم مننگ نا اداکاری کرسا کرے‘ اومیت کینہ کہ قوم لس گچین کاری تے ٹی دا فتنہ غان ملک ءِ بچفک۔2018 نا گچین کاری تا بابت تینا خیال آتا درشانی ءِ کرسا مولانا فضل الرحمن پارے کہ نن 2018 گچین کاری تیان پد اسمبلی تا باسک مننگ نا سوغند ہرفنگ خواتونہ ولے اپویشن جماعت آتا سوب آن دا وڑ کروئی تما نن کن بے کچ مشکل کننگا ولے نن صبر کرین‘ اومستی پارے کہ ننا چیئرمین پی ٹی آئی نا حکومت ءِ چٹفنگ خواتونہ ولے اپوزیشن تون کمک کننگ ناسوب آن اوفتتون سلیسن۔ مولانافضل الرحمان پارے کہ نن ہمو وخت آ ملکی وحدت کن اسیجا مسن نہ تو ننا موقف تینا جاگہ غا سلوک ءِ۔ مولانا فضل الرحمن پارے کہ پاک فوج ادارہ اسے اوڑتون اختلاف مننگ کپک ولے شخصیت آتتون اختلاف مننگ کیک۔

(آن لائن)