ریڈیو و ابلاغ نا ایلو وڑک قومی میرات ءُ، مریم اورنگزیب

لاہور :  حوالکاری وشینکاری نا بنجائی وزیر مریم اورنگزیب پارینے کہ حکومت و فوج انا برخلاف اسہ خاص ءُ ٹولی اس سوشل میڈیا غا بدبیسئی تالان کننگ ءِ‘ لسبیلہ شکست آ پراگندہ مہم چلیفنگا ہرانا مذمت ءِ کیوہ‘ وزیراعظم پرمان کرینے کہ ہمو بندغ آتا برخلاف سخت کارروائی کننگے ہرا فوج و آرمی چیف نابرخلاف مہم نا بشخ ءُ‘ ورناتے مثبت ذرائع ابلاغ نا گرج ءِ‘ پی ٹی آئی تینا دور حکومت اٹ کل ادارہ غاتے بھس کرے‘ چار سال اسکان ملک اٹ بدبیسئی نا بج دسنگا‘ ریڈیو و ابلاغ ناایلو وڑک قومی میرات و وخت انا گرج ءُ‘ سکرین ٹورازم نا کمک اٹ پاکستان نا مثبت بیانیہ ءِ مونی دروئی مریک‘ الس ءِ اڑزان تفریح فراوان کننگ نا کوشست کننگ اٹی ان۔ دا خیال آتادرشانی ءِ او یک شنبے نادے ریڈیو پاکستان لاہور اٹ چندی ڈٹ آتا بنائی دود و پریس کانفرنس آن تران کرسا کرے‘ حوالکاری نا بنجائی وزیر پارے کہ وزیراعظم محمد شہباز شریف نا وژن نارد اٹ میرات و دود ربیدہ نا کمک اٹ پاکستان نا مثبت امیج ءِ مچ آدنیا اسکان سرکروئی ءِ‘ دا وخت آ پاکستان نا ورنا چین ءِ مثبت ذرائع ابلاغ نا گرج ءِ انتئے کہ مسکوہی حکمرانک تینا چار سال انا دور حکومت اٹ کل ادارہ غاتے بھاز نسخان رسفیر‘ ہمو چار سال اٹ ملک اٹ بدبیسئی تالان کننگا‘ او پارے کہ وزیراعظم نا وژن دادے کہ ورناتا دوٹی پٹرول بمب آخا لیپ ٹاپ مرے‘ او پارے کہ مسلم لیگ (ن) نا حکومت 2017-18 ٹی فلم پالیسی نا بنداو ءِ تخا و داڑکن بجٹ ہم جتا کننگا ولے بدبختی دادے کہ مسکوہی حکومت ہر ادارہ ءِ بھس کرے‘ پاکستان ٹیلی وژن و ریڈیو پاکستان ءِ نیلام کننگ نا ہیت آک کننگار وخت اس کہ اوفتے دا کساس ہم الو کہ نیشنل براڈ کاسٹ نا نسخان کننگ نا جاگہ غا اوفتا رکھ ءِ کننگک‘ اوپارے کہ پاکستان اٹ دہشت گردی نا اسہ واقعہ اس مرے تو اودے مچ آدنیا ٹی نشان تننگک ولے پاکستان نا کلچرل ٹورازم نا دنیا ءِ سما اف ہرادے سکرین نا سیل سوات نا کمک اٹ مثبت بیانیہ جوڑ کرسا نشان تننگک و حکومت میرات‘ دود ربیدہ و سینما نا کمک اٹ کلچرل بیانیہ ءِ دوارہ بحال کننگ کن پورو کانود جوڑ کرینے۔ مریم اورنگزیب پارے کہ فلم جوڑ کننگ اٹ کاریم اٹ بروک ازباب آتا درآمد کنگ کن ایف بی آر نا کمک اٹ خراج ہلنگپک تاکہ زیات آن زیات فلم جوڑ مرے و دنیا ءِ پاکستان نا سافٹ امیج ءِ نشان تننگ مرے۔

(آن لائن)