عمران خان ولدا اسٹیبلشمنٹ نا کٹ اٹ تولسا بننگ خواہک، احسن اقبال

بدوملہی : بنجائی ڈٹ بندی و شونداری پروفیسراحسن اقبال پارینے کہ عمران خان ولدا اسٹیبلشمنٹ نا کٹ اٹ تولسا اقتدار اٹ بننگ خواہک‘ فوج اناکنڈآن مک تفی مفننگ آ فوج انا برخلاف دوبہ خلنگ نا بناءِ کرے‘ ہرا کاریم ءِ عمران خان کرے اودے دشمن کروڑ آروپئی تے خڑچ کننگ آن پد ہم کننگ کتوکہ۔ دا خیال آتا درشانی ءِ او میڈیا تون ہیت وگپ کرسا او پارے کہ عمران خان نا گام گیج آتیان ملک انا دشمنک خوش مسر‘ عمران خان سازش وڈٹ بندی اٹ 9مئی نا واقعہ غاتے کرفے‘ ڈٹ بندی کرسا فوجی ملکیت‘ میٹر واسٹیشن و ریڈیو پاکستان پشاور نا ماڑی ءِ خاخر تننگا‘ جاست پاست نا کمک اٹ زموار تے درست کننگ انگ ءِ ہراکان گڈ ہمو شرپسند آتے سخت سزا تننگک‘ عمران نیاز خواہک کہ اودے ولدا کمکار آتا کمک اٹ اقتدر اٹ اتنگے، پاکستان اٹ اولیکو اسہ وزیراعظم اسے بے پتی ناتحریک ناکمک اٹ اینک کننگا‘ عمرا ن خان تینا شکست ءِ امنا کننگ نا جاگہ غا امریکی سازش نا راج کرے‘ دا بندغ غیرکانودی و غیرآئینی وڑ اٹ اسمبلی تے تحلیل کرے‘ اوپارے کہ عمران خان خواہسکہ کہ اسٹیبلشمنٹ اودے ولدا کٹ اٹ تولفسا اقتدار اٹ اتے‘ عمران خان فوج انا کنڈآن مخ تفی مفننگ آ فوج انابرخلاف دوبہ خلنگ نا بناءِ کرے۔ بنجائی وزیر ڈٹ بندی احسن اقبال پارے کہ عمران خان نا سیاست نا وڑ ءِ پاکستان اٹ کس اس امنا کپک ولے پاکستان نا دشمن تپہ و میڈیا ٹی بھاز امنائی رسینگا انتئے کہ او سرپند مسرہ کہ عمران خان نا دا سیاست پاکستان ءِ نزور کننگ نا سوب مریک۔ ہندا زاری آ سیاست نا بھرم 9 مئی آ پیش تما‘ 9 مئی آ عمران خان ڈٹ بندی کرسا ہمو کل ہدف آتے شست کرے ہرا گنوکی اسے‘ داٹی ہم وڑ وڈول اس مریک، عمران خان نا 9 مئی آ ہرا گنوکی خننگک کہ شاید دا عمران خان نا دزگیری آ رد عمل اس ئس دا ردعمل اس الو‘ دا ڈٹ بندی اس ئس۔اوپارے کہ دا ہرا بندغ آک دا کاریم ءِ کریرہ او ہم نادرست الوس او پی ٹی آئی نا عہدیدار ئسر۔ عمران خان تینا مخ تف آتے فوج انا برخلاف بش کرے‘ تینا مخ تف آتا ذہن تے ٹی فوج انا برخلاف بدبیسئی ودی کننگ نا بناءِ کرے۔ احسن اقبال پارے کہ عمران خان بھاز پراگندہ و ملک دشمنی آ ساڑی مہم ءِ ملک انا تہٹی‘ ملک آن پیشن فوج و فوج انا سرکڑدہ و قومی ادارہ غاتا برخلاف بناءِ کرینے۔

(آن لائن)