کوئٹہ ڈوپلمنٹ پیکج آن شار شون ہلیک‘ عبدالعزیز عقیلی

کوئٹہ : چیف سیکرٹری بلوچستان عبدالعزیز عقیلی تدوک آ دے سہب انا وختی کوئٹہ شار انا دورہ ءِ کرے۔ او وخت آ ایڈمنسٹریٹر کوئٹہ عبدالجبار بلوچ، پراجیکٹ ڈائریکٹر رفیق بلوچستان، ڈپٹی پی ڈی محمد اظہر مندوخیل و ایلو کمامدار آک ہم اوفتتون اوار ئسر۔ چیف سیکرٹری کوئٹہ ڈویلپمنٹ پیکیج نا رداٹ انسکمب روڈ، اسپینی روڈ، سریاب روڈ، ریڈیو پاکستان روڈ، لنک بادینی روڈ و کوئٹہ گرین بس سروس پارکنگ ڈٹ آتا دورہ ءِ کرسا شونداری ڈٹ آتیا تعمیراتی کاریم نا گام گیج نا جاچ ءِ ہلکر۔ او ڈوپلمنٹ پیکج نا رداٹ شونداری ڈٹ آتیا کاریم نا ترندی ءِ ترند کننگ نا پارت کرسا پارینے کہ شونداری ڈٹ آتیا کل سختی تے زوت اس مر کننگے و یوٹیلیٹی سروس لائن تا زوت اس گدریفنگ ءِ پک کننگے تانکہ وخت اٹ شونداری ڈٹ آتے پک کننگے۔ او پارینے کہ ڈت آتے دوئی ویل آتا زوت اس ایسری و ہڑدے نا بنداو آ ڈٹ آتیا کاریم نا گام گیج نا جاچ ءِ ہلنگ نا ہم پارت ءِ کرے۔ او کمامدار آتے پارت کرے کہ اسپینی روڈ و ریڈیو پاکستان روڈ نا پوروی ءِ زوت اس پورو کننگے۔

(خ ن)